Үрүҥ эһэлэр Колыманалаах Ломоносов быйыл олунньуга оҕоломмутара. Тута Ломоносовы ырачааны тутан кэбиһиэн сөп диэн, атын арҕахха көһөрбүттэрэ. Бүгүн Колымана оҕотунаан арҕаҕыттан тахсан дьаарбайда.
Александр ТАРАСОВ, «Саха сирэ» хаһыат, edersaas.ru
«Орто дойду» зоопарка исписэлиистэрэ эрдэттэн бэлэмнэнэн, арҕах иһигэр анал видеокамера туруорбуттара уонна эһэчээн туругун кыраҕатык кэтээн, көрөн олорбуттара.
Лука Сафонов, «Орто дойду» зоопарка дириэктэрэ:
– Кырачаан эһэ кыыһа, уола биллэ илик. Тоҕо диэтэххэ, Колымана оҕотуттан адьас арахпат. Онон кыайан быһаарар кыахпыт суох. Ол эрээри, уон хонук иһинэн быһаардахпытына сатанар. Колымананы быстах кэмҥэ оҕотуттан араара сылдьыахпыт.
Сотору кэминэн айылҕа харыстабылын министиэристибэтэ эһэчээни ааттыырга куонкурус биллэриэҕэ. Балаһыанньата сайтка тахсыаҕа.
Өскөтүн, кырачаан эһэ тыһы буоллаҕына, хантараак быһыытынан, Санкт-Петербурдааҕы зоопаркаҕа бэриллэр. Атыыр буоллаҕына, төрөөбүт дойдутугар хаалар.
Санатар буоллахха, Колымананы 2012 сыллаахха Аан дойдутааҕы дьиикэй айылҕа пуондатын «Медвежий патруль» бырагыраама кыттыылаахтара Крестовскай уонна Эһэ арыыларын икки ардыларыгар муна сылдьарын булбуттара. Түөрт ыйдаах эһэ оҕотун «Орто дойду» зоопаркаҕа туттарбыттара.
Ломоносов туһунан манна ааҕыҥ.
Эһэчээн хараҕын аспыт уонна хаамар.
Колымана оҕото тыһы буоллаҕына, Санкт-Петербурга ыыталлар.
Александр ТАРАСОВ, «Саха сирэ» хаһыат, edersaas.ru
Хаартыска: соц.ситимтэн,
Видео: «Саха» НКИХ.