Бу быһылаан туһунан сайтпытыгар 2018 сыл сэтинньи 23 күнүгэр диэн «Вахтовиктарга» сүгэлээх кэлбиттэр» диэн иһитиннэриигэ суруйбуппут. Дьыала суукка көрүллэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
СӨ ИДьМ-тын пресс-сулууспатын иһитиннэриитинэн, полицияҕа баахтаҕа үлэлиир оробуочайтан сайабылыанньа киирбит этэ. Түүн кинилэргэ хас да уол түннүгү алдьатан киирэн, сүгэнэн куттаан туран, харчы былдьаабыттарын туһунан.
Үөһээ Бүлүү полициятын оперативниктара саба түһэн талааһыҥҥа уорбалаан, икки 19 саастаах, икки 20 уонна биир 23 саастаах уолаттары туппуттара.
Бу дьыала силиэстийэтэ бүтэн, суукка тиийэн көрүллэн, номнуо бириигэбэрэ таҕыста.
Суут быһаарбытынан, 2018 сыл алтынньы 25 күнүгэр бу уолаттар арыгылаан баран, биир уол этиитинэн, тутууга үлэлиир «вахтовиктарга» барарга санаммыттар. Харчы былдьаары. Уонна санааларын толорон, онно сүгэнэн, баалкынан уонна тимир куопсугунан сэбилэнэн тиийбиттэр.
Онно тиийэн, ааны аспатахтарын иһин, түннүгү алдьатан, иһирдьэ көтөн түспүттэр. Уонна сэптэринэн-сэбиргэллэринэн куттаан туран, оробуочайдартан арыгы уонна харчы түүрэйдээбиттэр. Ол эрэйдээхтэр 5 тыһ. солк. баарын биэрбиттэр, ону ылаат, талабырдьыттар куоппуттар, ол харчынан арыгы ылыммыттар.
Суут биэс уолу бэһиэннэрин РФ Холуобунай кодексатын 162-с ыст. 3-с чааһынан, ол эбэтэр, дьиэҕэ сокуоннайа суохтук киирэн талааһыҥҥа буруйдааҕынан билинэн, хас биирдиилэрин 7-лии сылга көҥүллэрин быһары усулуобунайынан ааҕан, 5 сылга тургутар болдьоххо уурда.
Ол эбэтэр, өскөтүн бу уолаттар 5 сыл устатыгар туох эмит бэрээдэги кэстэхтэринэ, буруйу оҥордохторуна, 7 сылга күлүүстээх хаайыыга бараллар. Билиҥҥитэ усулуобунай миэрэнэн көҥүлгэ хааллылар.
Бириигэбэр сокуоннай күүһүгэр киирбит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.