Саха АССР 100 сыла

Туроктар САССР үбүлүөйүнэн сюжет устубуттар

Турция биир биллэр-көстөр судаарыстыбаннай “ТРТ Аваз” диэн телеканалыгар бэҕэһээ Саха АССР өрөгөйдөөх үбүлүөйүн туһунан сюжет таҕыста.

Сюжетка муус устар 27 күнүгэр 1922 сыллаахха ВЦИК уурааҕынан Саха АССР тэриллибитин туһунан кэпсэнэр. «Саха норуота тыыннаах хааларыгар уонна салгыы сайдарыгар улахан хардыы оҥоһуллубута. Автономияны ситиһэргэ поэттар, учуонайдар уонна философтар сүҥкэн кылааттарын киллэрбиттэрэ», — диэтилэр. Салгыы 1992 сыллаахха муус устар 27 күнүгэр Саха АССР Үрдүкү Сэбиэтэ Конституцияны (Төрүт сокуону) ылыммытын эмиэ тумнубатылар.

Муус устар 27 күнэ көннөрү бырааһынньык эрэ буолбакка, өбүгэҕэ ытыктабыллаах сыһыан, саха омук судаарыстыбаннаһын туоһута, уопсастыба сайдыытыгар тутаах кэрдиис кэмэ буоларын тоһоҕолоон бэлиэтээтилэр.

Салгыы  сайпытыгар тахсыбыт Евразия суруйааччыларын сойууһа Саха сиригэр эҕэрдэтин  туһунан кэпсээтилэр. Сойуус бэрэссэдээтэлэ Йакуп Омероглу эҕэрдэтин туһунан суруйан турабыт.

Сюжеты киэҥ сиргэ көрбүт буолуохтаахтар. 2009 сыллаахха тэриллибит “ТРТ Аваз” Балкаҥҥа, Орто Азияҕа, Кавказка уонна Чугас Илиҥҥэ тахсар.  Азербайджанныы, босниялыы, туркменныы, киргизтыы, казахтыы, узбектыы саҥарар.  Документальнай киинэлэри, сериаллары, араас шоулары, музыкальный уонна култуураҕа сыһыаннаах биэрилэри көрдөрөллөр.

«Саха сирэ» хаһыат

Евразия суруйааччыларын сойууһа Саха сиригэр эҕэрдэтин ыытар

0
0
Telegram @edersaas20