Ааспыт нэдиэлэҕэ ыччат эйгэтигэр буолбут тэттик сонуннары билиһиннэрэбит. edersaas.ru сайтка тахсыбыт матырыйааллары ссылканан киирэн, сиһилии ааҕыаххытын сөп.
Устудьуоннар этэрээттэрин күнэ буолла. Олунньу 17 күнүгэр Манчаары Баһылай аатынан “Модун” спорт комплексыгар Саха сирин этэрээтин 400-чэ байыаһа муһунна. Дьокуускай куоракка быйыл күһүн Арассыыйа устудьуоннарын 58-с сүлүөтэ ыытыллара күүтүллэр.
Саха сирин лидер-кыргыттарын ахсыс форумун көрсө «Аныгы үйэҕэ кыыс анала», «Айар дьоҕуру уһугуннарыы уонна дьахтар дьарыга», «Оҕону хаалларыы кыһалҕата» тиэмэҕэ аһаҕас кэпсэтиилэр буоллулар.
Саха сиригэр Ыччат дыбарыаһын тутуутугар өйөбүл пуонда кэнэҕэски дыбарыас логотибыгар куонкурус биллэрдэ. Үлэлэри кулун тутар 10 күнүгэр диэри edersaas@mail.ru аадырыска тутабыт.
Олунньу 18-19 күннэригэр Серафим Попов кэриэһигэр Саха сирин тимир уустарын “Дархан Уус-2017” VIII быыстапката “Куруһаала” эргиэн киинигэр буолла. Манна 10 оскуола оҕото, устудьуон, 6 эдэр уус кытынна. Кинилэр быйыл Мирнэйгэ буолуохтаах Ыччат ыһыаҕар «Бастыҥ эдэр уус» күрэхтэһиитигэр кыттарга бэлэмнэнэллэр.
«Саха ыччатын — промышленноска-16» оскуола оҕолорун идэҕэ туһаайар экспедицияҕа сайаапка тутуута саҕаланна. Быйыл “СЫП-16” экспедиция кулун тутар ый бүтүүтэ, ол эбэтэр сааскы каникул кэмигэр ыытыллыаҕа. Бырайыакка онус кылаас эрэ оҕолоро кыттыыны ылыахтара. Экспедиция хайысхата: “Кыһыл Сыыр – Мирнэй — Ленскэй”. Сахатранснефтегаз, “АЛРОСА”, “ЯТЭК”, “СургутНефтеГаз” уо.д.а. биллэр улахан хампаанньалар эбийиэктэригэр экскурсия тэрийиллэрэ күүтүллэр.
Саха сирин улуустарын ыччатын «Зема» түмсүүтэ Мэҥэ Хаҥаласка идэҕэ туһаайар тэрээһиннэри ыытан кэллэ.
ХИФУ филология факультетын бастыҥ Кэрэ Куотун талар куонкуруһу игирэ Ушкановтарга көмөлөһөргө анаатылар. Кырачааннар «церебральный паралич» диэн диагнозтаахтар.
Ыччат бастыҥ бырайыагар Ил Дархан гранын биэриэхтэрэ. Сиһилии манна аах.
Кулун тутар 4-5 күннэригэр Аллараа Бэстээххэ быыбарга кыттыан баҕалаах ыччакка анаан «Кэнэҕэски баһылык оскуолата» семинар-форум буолуоҕа.
Ыччат сылын чэрчитинэн Уһук Илиҥҥэ Саха сирин бэрэстэбиитэлистибэтэ уонна «Кэскил» устудьуоннар түмсүүлэрэ байыаннай чаастарга сулууспалыы сылдьар уолаттары кытта көрсүһүүлэри тэрийэн саҕалаата. Тэрээһин Аҕа дойдуну көмүскээччилэр күннэригэр ананар. Сиһилии манна аах.