Сир аһын хомуйааччылартан нолуок хомуйуллуохтааҕын туһунан Владимирскай уобалас губернатора Светлана Орлова киллэрбит этиитин РФ Тыа хаһаайыстыбатын миниистирэ Александр Ткачев өйөөбүт үһү диэн сурах бүгүн батсаабы уонна да атын социальнай ситимнэри толордо.
Анивера АКИМОВА, «Саха сирэ» хаһыат, edersaas.ru
Үһү-бадах аҥаардаах сурах бүтүн Россияны тилийэ көттө. «Ама, хайаан, чунуобунньуктар олох даҕаны иирбиттэр», «Ткачев подсел на грибы», «Сотору тыынар салгыммытыгар нолуок киллэрэллэрэ буолуо» диэн хабааннаах элбэх кэпсэтии таҕыста.
Иһитиннэриигэ сурулларынан, губернатор Орлова Владимирскай уобаласка хомуллубут хас биирдии тэллэйтэн, отонтон, эриэхэттэн олохтоох бүддьүөккэ нолуок быһыытынан үп-харчы киириэхтээҕин этэр эбит. Онон, бүддьүөккэ тахсыбыт дефициты тэллэй, эриэхэ харчытынан «сабар» санаалаахтар үһү» (!!!). Сабаҕалааһын быһыытынан, дьэдьэни хомуйуу лицензията – 4500 солк., оттон тэллэйи хомуйуу – 6000 солк. тэҥнэһэр. Дьэ буолар да эбит.
Бу сурах төһө оруннааҕын чопчулаһаары, СӨ Тыатын хаһаайыстыбатын уонна СӨ Айылҕа харыстабылын министиэристибэлэрин пресс-сулууспаларын үлэһиттэрин кытары кэпсэтэ сырыттыбыт. Онуоха, сурах оруна суоҕун эттилэр.
Салгыы Владимирскай уобалас дьаһалтатын официальнай порталыгар уонна губернатор Светлана Орлова сайтыгар киирэн докумуоннарын, пресс-релизтэрин хасыһан көрдүм даҕаны, дуоннаах эппиэти булбатым. Тэллэй нолуогун туһунан кэпсэтии тахсыбатах.
Баҕар, Владимирскай уобалас бүддьүөтүгэр атын салаалартан нолуок киириитэ аҕыйах буолан, тэллэйтэн, отонтон, эриэхэттэн барыс аахсар санаалаахтара буолуо. Оттон биһиги өрөспүүбүлүкэбитигэр оннооҕор харчылаһаары отону соҕотуопкалаабаттар. Тэллэй, эриэхэ туһунан этэ да барыллыбат. Этэрбэс араадьыйатын итэҕэйимэҥ.
Ким эрэ видео оҥоро охсон интэриниэккэ ыыппыт.
Анивера АКИМОВА, «Саха сирэ» хаһыат, edersaas.ru сайт