Сунтаар улууһугар паромҥа сүгэлээх быһаарса тиийбит буруйдаахтарга бириигэбэр таҕыста
Ааспыт 2018 сыл бэс ыйын саҥатыгар Сунтаар сэлиэнньэтигэр паромунан туоруур сиргэ 20-тэн тахса киһи кыттыылаах, сүгэ-быһах сэбилэниилээх улахан охсуһуу буолбутун туһунан биһиги сайтпытыгар «Сунтаар паромугар сүгэлээх «быһаарсыы» кэнниттэн туох миэрэ ылылынна?«диэн матырыйаалга суруйан турабыт. Бүгүн СӨ Борокуратууратын пресс-сулууспата иһитиннэрбитинэн, бу дьыалаҕа кыттыгастаах 5 киһиэхэ суут бириигэбэрэ тахсыбыт.
Иирсээн “Татыйыына” хампаанньа паромун үлэһиттэрин уонна урут сууттана сылдьыбыт дьон икки ардыгар буолбута. Төрүөтэ диэн – кимнээх паромнара үрэҕи туоратыахтааҕын быһаарсыы.
Суут быһаарбытынан, 2018 сыл бэс ыйын саҥатыгар бу сууттанааччылар бэһиэ буолан, паромунан туоратар сиргэ тиийэн, «Татыйыына” хампаанньа паромун үлэһиттэрин быһаарсар сыаллаах тиийбиттэр. Итиэннэ эрдэттэн киксибит бөлөҕүнэн сүбэлэһэн тиийэн, уопсастыбаннай бэрээдэги куруубайдык кэһэн, күлүүгээнниир дьайыылары оҥорбуттар — сэби-сэбиргэли туттан, үлэһиттэри кырбаабыттар.
Ол курдук, үлэһиттэргэ бөрөстүүпүнньүктэр саха быһахтаах, этэбиэркэлээх уонна сүгэлээх саба түспүттэр. Кэккэ эмсэҕэлээччилэри быһаҕынан көхсүгэ тирээн туран, өлөрөрүнэн куттаан, суоһурҕанан, сүгэ ончоҕунан охсон, күүһү туттубуттар, массыыналарын көлүөһэлэрин тэспиттэр.
Суут кинилэри 15 эпизодка буруйдааҕынан билинэн, икки киһини 4 сылга уопсай эрэсиимнээх холуонньаҕа, биир киһини 4 сыл 6 ыйга, биир киһини 5 сылга кытаанах эрэсиимнээх холуонньаҕа көҥүллэрин быспыт.
Өссө биир киһиэхэ суут сымнатар өрүттэр быһыытынан, буруйун толору билиммитин, эмсэҕэлээччилэргэ оҥорбут хоромньутун толору төлөөбүтүн, буруйу арыйыыга көхтөөхтүк көмөлөспүтүн учуоттаан, 1 сыл 6 ыйга көҥүлүн хаарчахтаан туран, 500 тыһ. солк. сууммалаах ыстараап төлүүргэ уурбут.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Санатар буоллахха, маннык быһылаан тахсыбыта киэҥ араҥаҕа «Татыйыына» хампаанньа кэлэктиибэ социальнай ситимнэринэн тарҕаппыт суругуттан биллибитэ. Кинилэр СӨ ис дьыалаҕа миниистирэ Владимир Прокопенкоҕа сурук суруйбуттара.
Паромунан туоратыыны тэрийиигэ тахсыбыт быһылаанынан бэрэбиэркэ ыытар Сунтаар улууһун борокуратууратыгар уонна Ис дьыалаҕа отделыгар өрөспүүбүлүкэ борокуратууратыттан итиэннэ Ис дьыала министиэристибэтиттэн көмөҕө тиийэ сылдьыбыттара. Элбэх мунньах ыытыллыбыта.
Бу чахчынан биэс холуобунай дьыала тэриллибитэ:
РФ Холуобунай кодексатын 119-с ыст. 1 чааһынан (“Өлөрөрүнэн биитэр доруобуйаҕа ыарахан эмсэҕэлээһини оҥоруунан суоһурҕаныы”), 115-с ыст. 2-с чааһын “в” пуунунан (“Сэби-сэбиргэли туттан, доруобуйаҕа чэпчэки эмсэҕэлээһини оҥоруу”), 213-с ыст. 2-с чааһынан, ол эбэтэр, бөлөҕүнэн эрдэттэн киксэн күлүгээннээһин, ол эбэтэр, уопсастыбаннай бэрээдэги кэһии бэлиэтэ баарынан, 222-с ыст. 1 чааһынан, ол эбэтэр, боеприпастары сокуоннайа суохтук харайыы уонна 163-с ыст. 2-с чааһынан – бөлөҕүнэн эрдэттэн киксэн, түүрэйдээн ылыы бэлиэтэ баарынан.
Вера Макарова, «Саха сирэ» хаһыат, edersaas.ru
Хаартыска: YakutiaMedia.ru