Сайтпытыгар үнүр, кулун тутар 15 күнүнэр, «Лиза Андреева сүппүт чахчытынан дьыала тэрилиннэ» диэн иһитиннэриим бэчээттэммитэ. Онно икки сыллааҕыта бүтүн өрөспүүбүлүкэҕэ эрэ буолбакка, дойдуга тиийэ биллибит айдааннаах дьыала эмсэҕэлээччитэ — кырыктаахтык кырбаммыт оскуола үөрэнээччитэ Лиза Андреева — сураҕа суох сүппүтүн туһунан суруйбутум.
Вера МАКАРОВА, «Саха сирэ» хаһыат, https://edersaas.ru/
Кыыс кулун тутар 5 күнүгэр сарсыарда 07.00 чаас саҕана дьиэтиттэн тахсан баран, ууга тааһы бырахпыттыы сүппүтүн туһунан полицияҕа ийэтэ тыллаабыт этэ. Кыыс ханна да үөрэммэт, волонтерунан үлэлиир эбит. Дьиэтиттэн урут итинник барааччы диэн бэлиэтээбиттэрэ.
Дьокуускай куорат полицията Лиза туһунан биллэриини тута сонуну киэҥник сырдатар ситимнэринэн тарҕаппыта.
Кулун тутар 15 күнүгэр РФ Силиэстийэлиир кэмитиэтин Саха сиринээҕи управлениета иһитиннэрбитинэн, сокуоннай сааһын ситэ илик Елизавета Андреева сураҕа суох сүппүт чахчытынан РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэриллибитэ.
Кыыс сибээскэ тахсыбатаҕа ырааппытынан, куораттан ханна да барар санаата суоҕунан, докумуоннара уонна харчыта суох сылдьарынан, буруйу оҥоруу сиэртибэтэ буолбут буолуон сөп диэн сабаҕалааһын үөскээн, ити дьыала тэриллибитэ. Кулун тутар 15 күнүгэр кыыс 16 сааһын туолбут.
Оттон бэҕэһээ, кулун тутар 16 күнүгэр, полиция оперативниктара сүппүт кыыһы Нерюнгри куоракка билэр киһитигэр баарын булбуттар.
Санатар буоллахха, 2015 сыл тохсунньу ыйыгар Дьокуускай куорат 18-с №-дээх оскуолатыгар улахан айдаан тахсыбыта: 13 саастаах Лизаны бииргэ үөрэнэр Диана диэн кыыһа дьиикэйдик кырбыырын видеоҕа устан, бу буруй киэҥ эйгэҕэ биллибитэ. Бу кырбаабыт кыыс туох эрэ дьоруой курдук өссө ОРТ ханаалын биэриитигэр баран кыттан, Москваҕа күүлэйдээн кэлбитэ.
Вера МАКАРОВА, «Саха сирэ» хаһыат, https://edersaas.ru/
Хаартыска: интернеттэн.