Икки сыллааҕыта бүтүн өрөспүүбүлүкэҕэ эрэ буолбакка, дойдуга тиийэ биллибит айдааннаах дьыала эмсэҕэлээччитэ — кырыктаахтык кырбаммыт оскуола үөрэнээччитэ Лиза Андреева — аны буруйу оҥоруу сиэртибэтэ буолбут буолуон сөп. Кыыс сураҕа суох сүппүтэ 10 күн буолла.
Вера МАКАРОВА, «Саха сирэ» хаһыат, https://edersaas.ru/
Оҕото кулун тутар 5 күнүгэр сарсыарда 07.00 чаас саҕана дьиэтиттэн тахсан баран, ууга тааһы бырахпыттыы сүппүтүн туһунан полицияҕа ийэтэ тыллаабыт. Кыыс ханна да үөрэммэт, волонтерунан үлэлиир эбит. Дьиэтиттэн итинник барааччы үһү.
Дьокуускай куорат полицията Лиза туһунан биллэриини тута сонуну киэҥник сырдатар ситимнэринэн тарҕаппыта.
Тас көрүҥэ: саха, үрдүгэ 150-160 см, көрүҥүнэн 16-17 саастаах, хараҥа халлаан күөҕэ өҥнөөх тирии кууркалаах, маҥан өҥнөөх баайыы бэргэһэлээх, хара бүрүүкэлээх, хара өҥнөөх угги атах таҥастаах. Куорат киинигэр сылдьар буолуон сөп.
Полиция көрбүт-билбит дьону бу төлөпүөн нүөмэрдэригэр — 43-11-01; 43-12-13; 02 — эрийэллэригэр көрдөспүтэ.
Онтон бүгүн РФ Силиэстийэлиир кэмитиэтин Саха сиринээҕи управлениета иһитиннэрбитинэн, сокуоннай сааһын ситэ илик Елизавета Андреева сураҕа суох сүппүт чахчытынан РФ Холуобунай кодексатын 105-с ыст. 1 чааһынан холуобунай дьыала тэрилиннэ. Ол эбэтэр, киһини соруйан өлөрүү бэлиэтэ баарынан.
Кыыс сибээскэ тахсыбатаҕа ырааппытынан, куораттан ханна да барар санаата суоҕунан, докумуоннара уонна харчыта суох сылдьарынан, буруйу оҥоруу сиэртибэтэ буолбут буолуон сөп диэн сабаҕалаан. Бүгүн, кулун тутар 15 күнүгэр, кыыс 16 сааһын туолбут.
Санатар буоллахха, 2015 сыл тохсунньу ыйыгар Дьокуускай куорат 18-с №-дээх оскуолатыгар улахан айдаан тахсыбыта: 13 саастаах Лизаны бииргэ үөрэнэр Диана диэн кыыһа дьиикэйдик кырбыырын видеоҕа устан, бу буруй киэҥ эйгэҕэ биллибитэ. Бу кырбаабыт кыыс туох эрэ дьоруой курдук өссө ОРТ ханаалын биэриитигэр баран кыттан, Москваҕа күүлэйдээн кэлбитэ.
Вера МАКАРОВА, «Саха сирэ» хаһыат, https://edersaas.ru/
Хаартыска: интернеттэн.