1999 сыллаахтан Саха сиригэр Өрөспүүбүлүкэ күнэ национальнай бырааһынньык быһыытынан киэҥ далааһыннаахтык бэлиэтэнэр. Бу күн Дьокуускайга, улуустар кииннэригэр, нэһилиэктэргэ бырааһынньыктааҕы тэрээһиннэр ыытыллаллар.
Быйыл уон тыһыынча ыччат Кулаковскай уул. саҕалаан Орджоникидзе болуоссатыгар тиийэ, бары биир киһи курдук, сэлэлээн хаамтылар. Манна үгэс курдук өрөспүүбүлүкэ ыччатын түмсүүлэрэ кытталлар. Кинилэр Сахабыт сирин сайдыытын уһансыбыт улуу дьоммутун чиэстээтилэр, Ыччат сылын уруйдаатылар. Ону таһынан, хаамыы быйыл Сочи куоракка ыытыллыахтаах XIX Аан дойдутааҕы Ыччат түһүлгэтигэр (фестиваль) ананна. Онно биһиги өрөспүүбүлүкэбититтэн 150 саамай чаҕылхай, көхтөөх ыччат талыллан кыттыаҕа.
Судаарыстыбаннаһы олохтоспут саха чулуу дьонугар М.К. Аммосов, П.А. Ойуунускай, И.Н. Барахов, А.Е. Кулаковскай, С.В. Васильев, В.В. Никифоров-Күлүмнүүр өйдөбүнньүктэригэр, М.К. Аммосов мусуой-дьиэтигэр М.К. Аммосов бүүһүгэр, С.М. Аржаков өйдөбүнньүк дуоскатыгар Саха Өрөспүүбүлүкэтин салайааччылара, норуот дьокутааттара, СӨ бырабыыталыстыбатын чилиэннэрэ, уопсастыбаннас бэрэстэбиитэллэрэ кыттыылаах тыыннаах сибэккилэри ууруу сиэрэ-туома буолла.
Дьокуускай куорат болуоссаттарыгар, сквердэргэ кэнсиэрдэр, норуот күүлэйэ, спорт араас көрүҥнэригэр күрэхтэһиилэр, быыстапкалар, дьаарбаҥкалар, куонкурустар тэрилиннилэр, оскуолаларга кылаас чаастара, викториналар буоллулар, Новопортовской кыбартаалыгар Аныгы искусство дыбарыаһын бастакы атаҕын үөрүүлээх быһыыга-майгыга туруордулар.
Өрөспүүбүлүкэ күнүгэр Күлүмнүүргэ сүгүрүйдүлэр.
Улуустарга Өрөспүүбүлүкэ күнүн хайдах көрсүбүттэрин манна көрүҥ.
Хаартыска: Айтал Черноградскай,
«Саха сирэ» хаһыат, edersaas.ru