Бу былырыын буолбут суол быһылаанын туһунан биһиги сайтпытыгар 2017 сыл бэс ыйын 22 күнүгэр «Сунтаарга полицейскай суорума суолланна» диэн иһитиннэриигэ суруйбуппут.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу холуобунай дьыала суукка көрүллэн, бириигэбэр тахсыбыт.
Суут быһаарбытынан, Сунтаар улууһугар 2017 сыл бэс ыйын 21 күнүгэр, сарсыарда 09.00 чаас саҕана, Бүлүү суолун 1011-с км сиргэ суол быһылаана тахсыбыт. Бу Тойбохой сэлиэнньэтиттэн 2 км сиргэ тахсыбыт суол быһылааныгар УАЗ массыынаҕа полицейскай — Сунтаартан төрүттээх, 1989 сыллаах төрүөх, Сунтаардааҕы Ис дьыала отделын ГИБДД-тын полицейскайа Афанасий Федоров — соҕотоҕун айаннаан испит…
Джип суоппара суотабай төлөпүөнүгэр видео уста олорон, иннигэр айаннаан испит УАЗ массыынаны ситэн ааһаары гыммытыгар, УАЗ суоппара (полицейскай) харсыһымаары, туора диэки салайбыт. Онуоха чааска 100 км түргэннээхтик айаннаан испит «Тойота Лэнд Крузер» массыына суоппара уруулун кыайан салайбакка, «УАЗ-Хантер» массыынаҕа тиийэн түспүт.
Суут уурааҕынан, Сунтаартан төрүттээх 30 саастаах сууттанааччы 2 сыл 6 ыйга көс-холуонньаҕа көҥүлэ итиэннэ массыына ыытар бырааба быһылынна. Ону таһынан, эмсэҕэлээччилэргэ 700 тыһ. солк. суумалаах моральнай хоромньу төлүөҕэ.
Биһиги корр., «Саха сирэ» хаһыат, edersaas.ru
Хаартыскалар: РФ Силиэстийэлиир кэмитиэтин Саха сиринээҕи управлениета.