Суруйааччы Родион Данилов-Ородьумаан сүрүн хамнастаах үлэтин таһынан суруйар, уһанар дьарыктаах. Ол курдук, сыллата көрүөхтэн эрэккиэс оҥоһуктары айан таһаарар. Бу сырыыга ураты көстүүлээх ыскаамыйаны оҥорон, биир дойдулаахтарыгар бэлэх уунна.
Ол курдук Өлүөхүмэ улууһун Даппарай сэлиэнньэтин өрүс үрдүнээҕи скверигэр эһэ уонна мэкчиргэ киэргэллээх ыскаамыйаны бэлэхтээтэ. Сквергэ кыһыннары-сайыннары үгүс дьон мустар.
“Маҥнай оҕоруокка диэн былааннаабытым. Онтум пааркаҕа барсыах курдук буолла. Эбиитин өрүс үрдүнээҕи былаһааккаҕа ыскаамыйа суоҕун бэлиэтии көрбүтүм. Онон Кыайыы 75 сылынан нэһилиэгим дьонугар анаан бэлэхтээтим”, — диэн санаатын үллэстэр.
Үлэлэрин уонна дьырыгын туһунан манна edersaas.ru/rodion-danilov/ ааҕыаххытын сөп.
Ородьумаан нэһилиэгэр ити хаһыс даҕаны бэлэҕэ буолар. Ол курдук, былырыын оҕо былаһааккатыгар анаан, тимири иһэрдэн хаачыал оҥорон үөрдүбүтэ. Онтон үүт тутар пууҥҥа дьоҕус, олорорго тупсаҕай ыскаамыйаны бэлэх ууммута. Олохтоохтор Родион Лазаревичка махталлара муҥура суох.
Манна даҕатан эттэххэ, Ородьумаан кыра уола Родион аҕатын батан кыралаан уһанар. Оттон улахан уола Семен улахан тутууга ылсан үлэлии сылдьар.
Уус дьоҕурдаах дьиэ кэргэҥҥэ инникитин даҕаны ситиһиилэри баҕарабыт!
Людмила ПОПОВА, edersaas.ru