Муҥкуга Эйфель Башнята турда (хаартыска, видео)

Ааптар: 
Бөлөххө киир:

Өлүөхүмэ улууһун Муҥку сэлиэнньэтигэр ыраахтан-чугастан оҕо аймах тоҕуоруһа мустар. Манна муус, хаар оҥоһук арааһа, сырылыыр сыыр бэрдэ!

Муҥку Парк баазаны аан маҥнай 2007 сылтан биллэр уус, уруһуйдьут Архип Павлов үлэлэтэн саҕалаабыт. Салгыы Муҥку эдэр ыччата түмсэн арыйар буолбуттар. Кэлин Архип Дмитриевич уола Дмитрий Павлов, Михаил Шараборин урбаанньыт быһыытынан тэринэн, күн бүгүҥҥэ диэри сыллата биир дойдулаахтарыгар сааскы умнуллубат сынньалаҥы бэлэхтииллэр.

Быйыл эмиэ үгэс быһыытынан Муҥку Парк ыраахтан-чугастан оҕотуттан кырдьаҕаһыгар тиийэ ыраас салгыҥҥа мустар, сынньанар сирдэригэр кубулуйда. Эдэр саас саайт үлэһиттэрэ тэрийээччилэртэн биирдэстэрин Дмитрий Павловы кытта кэпсэтэ сырыттыбыт.

— Биир дойдулааҕым Михаил Шараборины кытта кыттыһан дьарыктанабыт. Муус, хаар оҥоһуктары, сылаас аһыыр дьиэни бэлэмнээтибит. Алта миэстэлээх бананынан хатааһылыахтарын, улахаттарга 170 миэтэрэлээх, оҕолорго 30-ча миэтэрэлээх, тюбиҥҥа аналлаах 500-чэкэ миэтэрэлээх сыыртан сырылыахтарын, атынан хатааһылыахтарын сөп. Тюбинг, ледянка прокаттыыбыт. Сылаас чэйи, шашлыгы хааччыйабыт.

Сыллата саҥа, сонун сүүрээннэри толкуйдуурга, сайдарга дьулуһабыт. Ол курдук, кэлин киэҥник биһирэнэр эрэр тюбинынан хатааһылыыр өҥөнү киллэрдибит.

Муус оҥоһуктары аҕам Архип Дмитриевич Павлов, хаар оҥоһуктары биир дойдулаахпыт Василий Прокопьевич Артахинов, Айаал Дмитриевич Балбахов чочуйдулар, — диэн кылгастык кэпсиир.

Муҥку Парк Өлүөхүмэҕэ биһирэниэн биһирэннэ. Оҕо-уруу, дьиэ кэргэн сыллата күүтүүлээх-кэтэһиилээх, сынньалаҥы бэлэхтиир миэстэтинэн буолла. Быйыл Муҥку пааркатыгар сылдьыбыттар Эйфель Башнятын аттыгар хаартыскаҕа түһэн үйэтиппэтэх түгэннэрэ суох быһыылаах. Ону таһынан, дьиэ кэргэн биһирэбилин ылбыт “Сүрэхтэр”, “Баҕа санаа трона”, “Булчут”, Крокодил Гена Чебурашкалыын, дельфиннар, о.д.а. оҥоһуктар ыалдьыттары үөрэ көрсөллөр.

Талааннаах уус, уруһуйдьут Архип Павлов биллиилээх снайпер Иван Кульбертинов кэпсээннэринэн өссө 40-тан тахса сыл анараа өттүгэр оскуолаҕа үөрэнэ сылдьан уруһуйдаабыт уруһуйдарын туһунан бу сигэнэн киирэн ааҕыаххытын сөп.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0