Кэбээйи улууһун Сэбээн Күөлүн олохтооҕо, 85 саастаах ытык кырдьаҕас Розалия Степанова анаан «Арктика эйгэтэ» быыстапкаҕа кыттаары кэргэнин кытта сөмөлүөтүнэн көтөн кэлбиттэр.
Елена ПОТОЦКАЯ, «Саха сирэ» хаһыат, edersaas.ru
— Кэргэним 75 саастаах Петр Неустроев эмиэ иистэнэр буолан, маннык улахан быыстапкалары көтүппэт буола сатыыр. Ол иһин иккиэн бу быыстапкаҕа кыттаары, таба тыһыттан үс ыйы быһа тикпит аан сабыытын (штора) дьоҥҥо-сэргэҕэ анаан көрдөрө аҕаллыбыт, — диэн кэпсиир Розалия Федоровна.
Бу сиэдэрэй көстүүлээх аан сабыытыгар кырдьаҕастар 45 устуука маҥан сибэккини, 16 устуука улахан хара сибэккини, 30 таба тыһын кырадаһыннарын биир-биир холбоон, ымпыктаан-чымпыктаан тикпиттэр.
— Оҕуруо оһуордары оҕонньорум бэйэтэ анньар. Онон оҕуруо өттө — киниэнэ. Оттон тыс кырадаһыныттан сибэккилэри мин тикпитим. Кэргэмминиин иккиэн иистэнэр дьарыктаах буолан, күн солото суох дьоммут. Хараҕым үчүгэй. Иннэбэр сабы бэйэм угабын. Оҕуруо анньар буолан, оҕонньор куоракка кэллэҕинэ, бэйэтэ таларын сөбүлүүр. Онон сиэннэрэ тиэйэ сылдьан, араас маҕаһыыннары кэрийтэрэллэр. Бу сырыыга эмиэ иннэбитин, саппытын, оҕуруобутун анаан хаһаанан барыахпыт, — диэн кэпсиир Розалия Федоровна. Ытык кырдьаҕас 11 оҕону төрөппүтүттэн, алта оҕото баар. Улахана баара буоллар, быйыл 64 сааһын туолуохтаах эбит.
— Табаһыт сиэннэрдээхпин. Ыстаада олоҕунан олорбут буолан, аны буолаары турар табаһыттар сийиэстэригэр сылдьыахпыт, — диэн былааннаах Кэбээйи кырдьаҕаһа.
85 саастаах Розалия Степанова: «Өбүгэлэрим уһун үйэлээх дьон. Ийэм 94-гэр, а5ам 97-гэр өлбүттэрэ. Онон мин 100 сааспар холкутук тиийиэм», — диир.
— 8 сааспыттан табах тардан баран, 45-пэр эмискэ бырахпытым. Онон табахтаабатаҕым 40 төгүрүк сыл буолла. Арыгыны олох испэтэх аһым. Чэйи да испэппин. Куртаҕым ыалдьар буолуоҕуттан үс сыл буолла, чэй оннугар саахардаах сылаас ууну эрэ испитим. Онон барбыт чэйи суохтаабаппын. Атаҕым үс сиринэн тостон эрэйдээтэ. Миэтэрэ аҕыс уон үрдүктээх этим. Ол бэйэм бу «кыччаан» сылдьабын. Сиспин «сиэн» уҥуохпун кыччатта, — диэн кэпсиир ытык кырдьаҕас.
Розалия Федоровна «Арктика эйгэтэ» курдук улахан быыстапкаҕа олоҕор аан бастаан кыттар эбит. Оттон кэргэнэ Петр Дмитриевич араас таһымнаах быыстапканы олох көтүппэт. Иллэрээ сыл миэстэлэһэн, оннооҕор Москваҕа буолбут быыстапкаҕа тиийэн кыттан кэлбит.
Ытык кырдьаҕастар сыралара үтүө ситиһиилэннэ — «Арктика эйгэтэ» быыстапкаҕа «Тыстан уонна тирииттэн оҥоһук» номинацияҕа үс ыйдаах үлэлэрэ биһирэбил бириискэ тигистэ. Ити курдук, «саас баттаата» диэн санааҕа ылларбакка, Кэбээйи Сэбээн Күөлүн ытык кырдьаҕастара ыччаттарга холобур буола сылдьаллар.
Быыстапка туһунан сиһилии манна ааҕыҥ.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.