Бүгүн икки күннээх «Арктика эйгэтэ» диэн аҕа уустарын общиналарын II сийиэстэрин чэрчитинэн ыытыллар быыстапка үлэтин саҕалаата.
Елена ПОТОЦКАЯ, «Саха сирэ» хаһыат, https://edersaas.ru
Быыстапканы СӨ Гражданскай уопсастыба институттарын сайдыытын министиэристибэтэ, Өксөкүлээх Өлөксөҋ аатынан норуоттар доҕордоһууларын дьиэтэ, Аҕыйах ахсааннаах норуоттар ассоциациялара, «Уус» норуот уус-уран оҥоһуктарын пуондата тэрийдилэр.
Суолталаах тэрээһиҥҥэ Хабаровскай уонна Камчатскай кыраайдартан, Магадан уобалаһыттан уус-уран тарбахтаах маастардар кыттыыны ылаллар.
СӨ Бырабыыталыстыбатын бэрэссэдээтэлин солбуйааччы Михаил Гуляев быыстапка кыттыылаахтарын эҕэрдэлиир тылыгар:
— «Арктика эйгэтэ» быыстапка Арктика уонна хоту дойду улуустарыгар үлэлиир норуот маастардарын өйүүр сыалтан иккис сылын тэриллэр. Бу тэрээһин региональнай суолталаах буолан, Уһук Хотугу Илин регионнарыттан кыттыыны ылаллара кэрэхсэбиллээх, — диэн бэлиэтээтэ.
Тэрээһиҥҥэ ыраах Анаабыртан алта саастаах Азалия Абдрашитова кытта кэлбит.
— Мин алтата утуйан турдахпына, аны муода көрдөрүүтүгэр кыттыахтаахпын, — диэн кэпсиир кыысчаан. Азалия доҕотторун кытта улууһун аатыттан быыстапка кыттааччыларын эҕэрдэлиир кэнсиэргэ кытынна.
«Арктика эйгэтэ» быыстапка кыттааччыларын кытта СӨ Гражданскай уопсастыба институттарын сайдыытын миниистирэ Сардаана Гурьева көрсөн, санааларын иһиттэ, үлэлэрин кытта билистэ.
Быыстапкаҕа түүлээх таҥас арааһа дьон болҕомтотун тарта. Ордук муомалар, өлөөннөр, аллайыахалар «күннээтилэр».
Өймөкөөн Сордоҥнооҕуттан Екатерина Таркова бэйэтин муннугар кус түүтүттэн оҥорбут хартыыналара болҕомтону тарта.
Өрөспүүбүлүкэ 12 улууһуттан кэлбит маастардар быыстапка кэмигэр холкутук олорон олохторун-дьаһахтарын кэпсэттилэр, тугунан да кэмнэммэт сыаналаах үлэ уопутун атастастылар.
Сарсын быыстапка үлэтин түмүктүөҕэ. Кыайыылаахтар муус устар ыйга Москваҕа норуоттар икки ардыларынааҕы быыстапка-куонкуруска кытта барыахтара.
Елена ПОТОЦКАЯ, «Саха сирэ» хаһыат, https://edersaas.ru