«Саханефтегазсбыт» тэрилтэ улуустарга ыраах сытар нэһилиэктэргэ анал иһиттээх уматыгы атыылыыр бырайыагы 2014 саҕалаабыта.
Александр Тарасов, «Саха сирэ» хаһыат, https://edersaas.ru/.
Маны үгүс нэһилиэк сэргээбитэ уонна тута туһанан барбыта. Эрдэтээҥи бырайыагынан, иһиттээх уматыгы миэстэтигэр тиэрдии ороскуотун нэһилиэк дьаһалтата уйунар этэ. Итини ыарырҕатан үгүс баһылык сакаастаабакка олорбут.
Ньурба улууһун Чуукаарыгар СӨ бырабыыталыстыбатын отчуотун кэмигэр ити боппуруоһу олохтоохтор иҥэн-тоҥон ыйыталастылар. Бастаан утаа ыраах сытар буолан, бүтүн саппараапканы туруорустулар. Онуоха анал иһиттээх уматыгы сакаастаан туһаныахтарын сөбүн эттилэр.
Ыспыраапка
«Иһиттээх бензин» бырайыак, куоракка бытыыллаах ыраас ууну таһыы бириинсибинэн үлэлиир. Уматыгы сакаастыырга, бастаан иһиттээҕи атыылаһыахха наада. Салгыы астаах иһит кэллэҕинэ, кураанах иһити биэрэн ыытыллар.
Ньурба Чуукаарыгар иһиттээх бензины тиэрдии ороскуотун тустаах хампаанньа уйунарын истэ иликтэр эбит. Бырабыыталыстыба отчуотун бөлөҕөр «Саханефтегазсбыт» ААУо генеральнай дириэктэрин 1-кы солбуйааччы Анатолий Рыбкин сылдьыста.
Анатолий Рыбкин:
— Бу бырайыакпыт улуус кииниттэн ыраах сытар уонна суола-ииһэ мөлтөх нэһилиэктэргэ табыгастаах. Үгүс нэһилиэк туһанан эрэр. Ордук Бүлүү, Үөһээ Бүлүү улуустара сакаастыыллар. Бырайыагы саҕалыырбытыгар уматыктаах иһити тиэйии ороскуотун дьаһалта төлүүр этэ. Ол уларыйан, кэлин тиэйии ороскуотун «Саханефтегазсбыт » хампаанньа уйунар буолла. Ыраах сытар нэһилиэктэргэ тиэрдиллэр анал иһиттээх уматык сыаната улуус киинин кытта тэҥ.
Александр Тарасов, «Саха сирэ» хаһыат, https://edersaas.ru/.
Сыыппара
«Саханефтегазсбыт» өрөспүүбүлүкэ үрдүнэн:
25 базалаах
100 саппараапкалаах
2000 үлэһиттээх.
Манна майгынныыр суруйууну ааҕыҥ:
Чурапчыга бензин Аллараа Бэстээхтэн икки солкуобайынан чэпчэки