«Туймаада-Нефть» Чурапчыга уматык сыанатыгар муҥутуур кыра сыананы олохтоото. Ол курдук, тохсунньу 11 күнүттэн Аи-92 уонна Аи-95 мааркалаах уматыкка сыананы түһэрдэ. Билигин 92-лээх бензин Чурапчыга 46 солк. 30 харчыга, оттон 95-тээх бензин биир лиитирэтэ 47 солк. 30 харчыга атыыланар. Сыананы Чурапчы сэлиэнньэтигэр эрэ түһэрдилэр. Улуус нэһилиэктэригэр баар АЗС-га сыана оннунан хаалла. Киһи сөҕүөн иһин, хампаанньа нефтебазатын кытары ыаллаһа сытар Аллараа Бэстээх уонна Дьокуускай куоракка сыананы тыыппатылар. Бу тугу кытары сибээстээҕий?»…
Анивера Акимова, «Саха сирэ» хаһыат, https://edersaas.ru/
Бу күннэргэ батсаап социальнай ситим нөҥүө маннык ис хоһоонноох сурах тарҕанна. Сурах төһө оруннааҕын билээри, «Туймаада-нефть» атыы-эргиэн салаатын кытары сибээскэ тахса сатаабыппар, генеральнай дириэктэргэ утаардылар. Хампаанньа салайааччытыгар эрийбиппэр, аны сибээспит быстан хаалла. Аҕыйах мүнүүтэнэн хат төлөпүөннээбиппэр, киһибит номнуо «суола сойбут» этэ.
Салгыы хампаанньа официальнай сайтыгар киирэн, уматык сыанатын үөрэтэн көрдүм. Кырдьык, Чурапчы сэлиэнньэтигэр 92-лээх бензин 46 солк. 30 харчы диэн сурулла сылдьар. Тэҥнэбилгэ нэһилиэктэри көрүөххэ. Мугудайга – 48 солк. 30 харчы, Мындаҕаайыга, Сылаҥҥа, Дириҥҥэ – 49 солк. 20 харчы. Көрөргүт курдук, араастаһыыта харахха быраҕыллар.
Нормаль-80 бензин Чурапчыга – 35 солк. 90 харчынан быһыллыбыт. Мугудайга – 36 солк. 80 харчы, Мындаҕаайыга, Сылаҥҥа, Дириҥҥэ – 37 солк. 30 харчы.
[vc_single_image image=»13939″ img_size=»full» onclick=»link_image»]Атын улуустары кытары тэҥнээтэххэ, Ытык Күөлгэ 92-лээх бензин – 48 солк. 40 харчы, Баайаҕаҕа – 49 солк. 60 харчы. Уус Алдан Тандатыгар – 49 солк. 60 харчы, Өлүөхүмэ Саҥыйахтааҕар – 49 солк. 60 харчы, Ньурбаҕа 48 солк. 40 харчыга тэҥнэһэр.
Улуустары кытары сыана араастаһара биллэр. Тиэйиитэ-таһыыта, кирэдьиит, страховка харчыта, харайыы ороскуота, атыы-эргиэн эбилигэ ааҕыллар. Онон куорат, киин улуустар, трасса таһыгар, кытыы сытар нэһилиэктэргэ тус-туһунан сыана олохтонорун туһунан сайтка сурулла сылдьар.
Анивера Акимова, «Саха сирэ» хаһыат, https://edersaas.ru/