Ол туһунан брифинг кэмигэр вице-премьер Михаил Никифоров кэпсээтэ.
Былааны куоһарбыт Хаҥалас улууһа кыстыгы туоруур ото бэлэм (былаан 99%-на туолбут). Тилэх баттаһа Мэҥэ Хаҥалас, Нам уонна Амма улуустара иһэллэр. Бу иннинэ былааннарын тэҥнээтэххэ аҕыйах сүөһүлээх Үөһээ Халыма, Булуҥ, Абый уонна Уус Майа толорбуттара. Хаалылаахтар: Кэбээйи — 41%, Дьааҥы — 45%, Бүлүү — 60%, Өлүөхүмэ — 70%.
Балаҕан ыйын 15 күнүнээҕи туругунан өрөспүүбүлүкэҕэ 361 970 тыһ. туонна от кээһиллибит, ол былаан 82 %-на. Сиилэс – 23 168 туонна (былаан 81%-на туолбут).
Быйыл ардахтаах буолан, сорох улуустарга аһыҥа туран кыстык оту булунарга кыһалҕа үөскээбитэ. Ол иһин Ил Дархан Айсен Николаев дьаһалынан көһө сылдьан оттуур биригээдэлэр тэриллибиттэрэ. Мобильнай биригээдэ тэрээһинин харчыта улуустарга тиэрдиллибит.
Михаил Никифоров этэринэн, мобильнай биригээдэлэр былааннарын аҥарын толорбуттар. “Былааннаммыт 53 339 туонна оттон 28 819 туоннаны оттообуттар, ол аата 54% туолла”, — диир кини.
Ил Дархан уонна Бырабыыталыстыба пресс-сулууспата
«Бука бары окко» хаартысканан күрэх кыайыылааҕа Михаил Колодезников (Уус Алдан улууһа, Кэптэни) “Сиэннэр улаатан көмө дьоно” диэн хаартыската.