Элбэх оҕолоох ыал көҥүл тустууга аан дойду Кубогар босхо сылдьыахтара
Кулун тутар 15-17 күннэригэр Дьокуускайга буолар көҥүл тустууга аан дойду Кубогар социальнай өттүнэн көмүскэлэ суох уонна элбэх оҕолоох ыалларга босхо билиэттэр көрүллүөхтэрэ. Бу туһунан ситэриилээх былаас быһа эфиргэ отчуотугар вице-премьер Ольга Балабкина иһитиннэрдэ.
Бу иннинэ спорт миниистирэ Иннокентий Григорьев иһитиннэрбитинэн, күрэхтэһии кыттааччытын ахсаана 300-тэн тахса киһи буолара сабаҕаланар. Хас биирдии хамаанда уон бөҕөстөн турар сүрүн састаабы сэргэ саппааска уон тустуугу илдьэ кэлиэҕэ. Ону таһынан тириэньэрдэр, хамаандалар бэрэстэбиитэллэрэ, судьуйалар кэлэллэрэ күүтүллэр. Күрэс кэмигэр 800-тэн тахса киһи – тэрийээччилэр, суруналыыстар, волонтердар уо.д.а. – аккредитацияны ааһыаҕа.
“Күрэхтэһиигэ социальнай өттүнэн көмүскэлэ суох ыаллар оҕолоро, тустуунан дьарыктанар спорт оскуолалар иитиллээччилэрэ, спорт бэтэрээннэрэ босхо сылдьыахтара”, — диэн Иннокентий Григорьев эппитэ.
Санатан эттэххэ, эр дьон ортотугар көҥүл тустууга аан дойду Кубогар аҕыс дойду— Япония, Грузия, Куба, Турция, Монголия, Иран, АХШ уонна Арассыыйа бөҕөстөрө күөн көрсүөхтэрэ.