Спорт бэтэрээннэрэ, эдэр тустууктар уонна тииммэт-түгэммэт ыаллар оҕолоро аан дойду Кубогар босхо сылдьыахтара
Бу туһунан Кубогы тэрийэн ыытар дирекция тохсунньу 28 күнүгэр буолбут мунньаҕар өрөспүүбүлүкэ спордун миниистирэ Иннокентий Григорьев иһитиннэрдэ. Кэпсэтиигэ Арассыыйа спортивнай тустууга федерациятын толорооччу дириэктэрэ Александр Деревянко, федерация эппиэттээх оператора Сергей Москвитин итиэннэ федерация чилиэнэ Владислав Чернявскай кыттыыны ыллылар.
Аҕыс сыллаах тохтобул кэнниттэн көҥүл тустууга аан дойду Кубога Арассыыйаҕа ыытыллыаҕа. Саха Өрөспүүбүлүкэтин Ил Дархана Айсен Николаев дойду спортивнай тустууга федерациятын бэрэсидьиэнигэр Михаил Мамиашвилига уонна Арассыыйа сүүмэрдэммит хамаандатын сүрүн тириэньэригэр Дзамболат Тедеевкэ Кубок күрэхтэһиитин Дьокуускайга ыытар туһунан этии көтөхпүтэ. Айсен Николаев көҕүлээһинин Тустуу холбоһуктаах эйгэтэ (UWW) 2018 сыл ахсынньы 26 күнүгэр ылыммыта.
Иннокентий Григорьев иһитиннэрбитинэн, күрэхтэһии кыттааччытын ахсаана 300-тэн тахса киһи буолара сабаҕаланар. Хас биирдии хамаанда уон бөҕөстөн турар сүрүн састаабы сэргэ саппааска уон тустуугу илдьэ кэлиэҕэ. Ону таһынан тириэньэрдэр, хамаандалар бэрэстэбиитэллэрэ, судьуйалар кэлэллэрэ күүтүллэр. Күрэс кэмигэр 800-тэн тахса киһи – тэрийээччилэр, суруналыыстар, волонтердар уо.д.а. – аккредитацияны ааһыаҕа.
“Күрэхтэһиигэ социальнай өттүнэн көмүскэлэ суох ыаллар оҕолоро, тустуунан дьарыктанар спорт оскуолалар иитиллээччилэрэ, спорт бэтэрээннэрэ босхо сылдьыахтара”, — диэн Иннокентий Григорьев эттэ.
Арассыыйа спортивнай тустууга федерациятын толорооччу дириэктэрэ Александр Деревянко тэрээһин үлэ сүрүн хайысхаларыгар тохтоото. Федерация чилиэннэрэ күрэхтэһии кыттыылаахтара, ыалдьыттара түһэр-аһыыр сирдэригэр, “Триумф” Спорт киинигэр сырыттылар. Уонна түмүккэ Саха сирэ Бүтүн Арассыыйатааҕы, норуоттар икки ардыларынааҕы таһымнаах күрэхтэһиилэри тэрийэн ыытыыга баай уопуттаах, онон эр дьон ортотугар көҥүл тустууга аан дойду Кубога Дьокуускайга үрдүк таһымнаахтык ыытыллыаҕар эрэнэллэрин билэрдилэр.
Санатан эттэххэ, эр дьон ортотугар көҥүл тустууга аан дойду Кубога бу дьыл кулун тутар 15-17 күннэригэр Дьокуускайга ыытыллар. Онно аҕыс дойду— Япония, Грузия, Куба, Турция, Монголия, Иран, АХШ уонна Арассыыйа бөҕөстөрө күөн көрсүөхтэрэ.
Роман Попов
Хаартыска Интэриниэттэн ылылынна.