Саха многоборьетын сайыҥҥы сүрүн түһүлгэтэ чугаһаатар чугаһаан иһэр. Икки сүүмэрдиир күрэхтэһии түмүгүнэн «Дыгын оонньууларыгар» кыттар быраабы тоҕус бөҕөс ылла.
Ол курдук, бастакы күрэхтэһии биэс бириистээх миэстэ иһигэр киирэн, 2013 сыллаахха бэһис миэстэ буолбут Алексей Иванов (Үөһээ Бүлүү), «Дыгын оонньууларын» 2015 сыллааҕы кыайыылааҕа Алексей Кутуков (Нам), «Дыгын оонньууларын» былырыыҥҥы кыттыылааҕа Николай Матаннанов (Таатта), 2016 сыллаахха Сахаачча бирииһигэр ыытыллыбыт многоборьеҕа күрэхтэһии муҥутуур кыайыылааҕа Леонид Филиппов (Амма) уонна «Дыгын оонньууларын» 2014 сыллааҕы кыайыылааҕа Петр Старостин (Чурапчы) путевка хаһаайыттарынан буоллулар. Иккис сүүмэрдиир күрэхтэһиигэ тыҥааһыннаах киирсии түмүгүнэн «Дыгын оонньууларын» сэттэ төгүллээх кыайыылааҕа Иван Белолюбскай (Уус Алдан), «Дыгын оонньууларын» хас да төгүллээх кыттыылааҕа Антон Тойтонов (Нам), өрөспүүбүлүкэ биир бастыҥ мадьыныта Иннокентий Миронов (Өлүөхүмэ) уонна Таас көтөҕүүтүгэр өрөспүүбүлүкэ рекордсмена, Саха сирин биир күүстээх мадьыныта «Дыгын оонньууларын» хас да төгүллээх кыттыылааҕа Дьулустаан Ноговицын (Горнай) киирсиэхтэрэ.
Оттон былырыыҥҥы «Дыгын оонньууларын» түмүгүнэн үс бастыҥ многоборецтар Артем Варданян (Нам), Алексей Козлов (Усуйаана) уонна 2016 сыллааҕы «Дыгын оонньууларын» муҥутуур кыайыылааҕа Егор Филиппов (Хаҥалас) быһалыы киирдилэр. Кыттааччыларбыт ханнык көрүҥҥэ үчүгэй бэлэмнээхтэрин, оттон мөлтөх өрүттэрин тупсаран биэрбиттэрин ырытан көрдүбүт.
Үс төгүл үс
Бу көрүҥҥэ биллэр ыстаныык, өрөспүүбүлүкэ рекорсмена Егор Филиппов кыайара чуо. Холобур, былырыын 37м 51см ойбут буоллаҕына, быйыл ити көрдөрүүтүн куоһарар туруктаах.
Тутум эргиир
Бу көрүҥҥэ кэнники үс сылга «Дыгын оонньууларыгар» кыттарын тухары Петр Старостин иннин биэрэ илик. Ол эрэн, быйылгы бастакы сүүмэрдээһиҥҥэ Алексей Иванов Петр Старостины ситэн турардаах.
Мас тардыһыыта
Мас тардыһыытыгар Иннокентий Миронов уонна Алексей Козлов бастыҥнар. Иннокентий Миронов мас тардыһыытыгар өрөспүүбүлүкэ улахан түһүлгэлэрин призера уонна кыайыылааҕа. Онтон Алексей Козлов мас тардыһыытынан анаан эрчиллэр уонна өрөспүүбүлүкэ күүстээх мадьыныларын ахсааныгар киирсэр.
Оҕунан ытыы
Егор Филиппов көтөр атахтааҕынан эрэ буолбакка, кыраҕы хараҕынан биллэр. Ааспыт «Дыгын Оонньууларыгар» 58 очукуону ытан, күрэхтэһии рекордун олохтообута. Онон, Егор Филиппов оҕунан ытыыга лидер.
400 миэтирэҕэ сүүрүү
Быйылгы сүүмэрдээһиҥҥэ быһый атахтааҕын Леонид Филиппов көрдөрбүтэ. Оттон былырыыҥҥы оонньууларга Петр Старостин тэннээҕин булбатаҕа, манна даҕатан эттэххэ Артем Варданян кыттыбытын тухары сүүрүүгэ үс бастыҥ иһигэр сылдьыбыта.
Хапсаҕай
Хапсаҕай халбас харата, ол иһин сэрэбиэй оруоллаах. Сүүмэрдиир түһүмэххэ уонна Уйбаан Белолюбскай бирииһигэр быйылгы турнирга Антон Тойтонов кимиэхэ да иннин биэрбэтэҕэ. Антоҥҥа сэттэ төгүллээх чөмпүйүөн Уйбаан Белолюбскай уонна «Дыгын оонньууларын» 2015 сыллааҕы кыайыылаҕа Алексей Кутуков улахан утарсыыны оҥоруохтара.
Таас көтөҕүүтэ
Штанганы тардыыга Россия спордун маастара Дьулустан Ноговицын утарсааччыларын ырааҕынан хаалларыа диэн дьон бигэ эрэллээх.
Саха многоборьетыгар элбэх көрүҥнээх, ол иһин уопсай түмүгү эрдэттэн сабаҕалыыр уустук. Кыттылаахтарга ситиһиини баҕарабыт.
Уйбаан Белолюбскай бүтэһик “Дыгына”
Көрөөччүлэр Дыгын оонньууларын сэттэ төгүллээх кыайыылааҕа Иван Белолюбскай Үс Хатыҥҥа буолар ат бөҕө, кус быһый уолаттар күрэхтэһиилэригэр эмиэ кыттар буолбутуттан олуһун диэн үөрдүлэр.
Иван Белолюбскай, “Дыгын оонньуулара” күрэхтэһии сэттэ төгүллэээх кыайыылааҕа:
— Мин иитиллээччилэрим, Манчаары Баһылай аатынан “Модун” спорт национальнай көрүҥнэригэр кииҥҥэ дьарыктыыр, бииргэ эрчиллэр уолаттарым Дьулустаан Ноговицын, Иннокентий Миронов Дыгын оонньууларыгар кыттар буолбуттарыттан ордук улаханнык үөрдүм. Туймаада ыһыаҕар ситиһиилээхтик кыттыахтара диэн эрэнэбин.
Уонна, биллэн туран, эдэр уолаттары кытта тэҥҥэ эриһэн Дыгын оонньууларыгар кыттар быраабы ылбыппыттан астынным. Мин сүрүн соругум ол этэ. Ону ситистим. Быйыл ыһыах иннинэ түөрт уон сааспын туолабын, онон дьонум-сэргэм иннигэр бүтэһигин тахсан, кыахпынан күрэстэһэр санаалаахпын.
Дьулурҕан «Саха Сирэ» хаһыат, edersaas.ru