Сүрүн Экэниэмикэ

Дьокуускайга өссө биир саҥа кыбартаал үлэҕэ киллэриллиэҕэ

РФ Бырабыыталыстыбатын бэрэссэдээтэлин солбуйааччы – Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев  СӨ Ил Дархана Айсен Николаевы кытары  Дьокуускай куоракка “Звезднай” кыбартаал тутуутун билистилэр.

edersaas.ru

“Звезднай” тутуу бырайыага өрөспүүбүлүкэҕэ биир саамай улахан тутуу былаһааккалааҕынан ааҕыллар. 68,5 гаалаах сиргэ элбэх кыбартыыралаах 30 дьиэни  уонна  аҕыйах мэндиэмэннээх 36 дьиэни тутуу былааннанар. Дьиэлэр 2-8 мэндиэмэннээхтэр, 264 уопсай иэннээх  дьиэлэргэ  11 тыһыынча курдук киһи олоруоҕа. Тутуу былырыын саҕаламмыта.

«Билигин тутуу тэтимин ылла. Биһиги бэлэмнэммэтэх былаһааккаҕа кэлбиппит, инфраструктураны барытын оҥорор, ситимнэри тардар наада этэ. Ол олус улахан үлэ. Уһук Илиҥҥи бырагыраамалар көмөлөрүнэн  инфраструктураны уонна ситимнэри оҥоруу үлэтин кэнниттэн биллэ элбэх дьиэни тутуохпутун сөп. Өссө киэҥ хабааннанан, 70-80-нуу тыһыынча кв.миэтэрэ иэннээх дьиэлэри үлэҕэ киллэриэхпитин сөп”, —  диэн Айсен Николаев кэпсээтэ.

Билигин эбийиэккэ 370 киһи үлэлиир. Сыл бүтүөр диэри  28,6 тыһыынча кв.миэтэрэ иэннээх элбэх кыбартыыралаах сэттэ  дьиэ үлэҕэ киллэриллиэҕэ.Манна 2 тыһыынчаттан тахса киһи кыбартыыра ылыаҕа, ол иһигэр саахалланар дьиэлэр пуондаларыттан 1,9 тыһыынча киһи көһөрүллүөҕэ. Саҥа микрооройуоҥҥа дьиэ ыларга нэһилиэнньэ “Уһук Илиҥҥи ипотека”, “Чэпчэтиилээх ипотека”, “Дьиэ кэргэн ипотеката” чэпчэтиилээх кирэдьииттэринэн туһаныахха сөп. Тутар-таҥар үлэлэри биэс бэдэрээттэһэр тэрилтэ ыытар. Дьиэлэр 40-60 бырыһыаннара бэлэм. Саҥа микроройуон социальнай инфраструктуранан, ол иһигэр уһуйаан дьиэтинэн уонна оскуоланан, хааччыллыаҕа. 2027 сылга диэри 30 элбэх кыбартыыралаах уонна 36 аҕыйах мэндиэмэннээх дьиэ тутуллуоҕа. Ону таһынан  оскуолаҕа киириэн иннинээҕи саастаах  690 оҕо 2 тэрилтэтэ уонна 1980 үөрэнээччилээх икки оскуола баар буолуохтара. Симиэнэҕэ 600 киһи сылдьар поликлиника тутуллуоҕа. Элбэх хайысхалаах успуорт саалалаах  сабыылаах катокка  успуордунан дьарыктаныахтара. Ону таһынан маҕаһыыннар, супермаркеттар уо.д.а. баар буолаллара былааннанар.

Юрий Трутнев Дьокуускайга уонна өрөспүүбүлүкэ нэһилиэнньэлээх пууннарыгар олорор дьиэ квадратнай миэтэрэтин  сыанатын кыччатар наадатыгар болҕомтону туһаайда. Вице-премьер чуолаан Уһук Илини сайыннар Арассыыйа   министиэристибэтигэр «Уһук Илиҥҥи кыбартаал” механизмы туһанан “Звезднайга” квадратнай миэстэ сууматын  түһэрэр кыаҕы көрөргө сорудахтаата. “Тоҕо диэтэххэ, биир квадратнай миэтэрэҕэ 130 тыһыынча – үрдүк сыана. Саха сирин уонна уонна Уһук  Илин атын эрэгийиэннэрин сөптөөх сыаналаах олорор дьиэнэн хааччыйыахха наада”, — диэтэ Юрий Трутнев.

Санатан эттэххэ, “Уһук Иликки кыбартаал” – сөптөөх сыанаҕа хаачыстыбалаах дьиэни биир кэлим тутуу бырагыраамата. Тутааччы квадратнай миэтэрэ сууматын кыччатарын иһин сир босхо бэриллэр.


«Звезднай» кыбартаал туһунан сиһилии манна ааҕыҥ:

ДЬОКУУСКАЙГА “СУЛУСТААХ” МИКРООРОЙУОН

Надежда ЕГОРОВА, “Саха сирэ”,  edersaas.ru (СӨ Ил Дарханын пресс-сулууспатын иһитиннэриититтэн бэлэмнэннэ)

0
1
Telegram Whatsapp