«АЛРОСА» хампаанньа былдьаһыктаах «кириэһилэтигэр» аны “Сбербаан” вице-президенинэн үлэлээбит Сергей Иванов олордо. Тумус туттар хампаанньабытын бу сыллар тухары элбэх киһи салайан ааста. Ол курдук, Штыров, Калитин, Выборнов, Ничипорук, Андреев, Жарков. Кинилэр хаһан уонна хайдах үлэлээн ааспыттарын кылгастык ырытан ааһыахха.
Анивера Акимова, «Саха сирэ» хаһыат, https://edersaas.ru/
Вячеслав Штыров
Саамай уһуннук 1996 сылтан 2002 сылга диэри Вячеслав Штыров «АЛРОСА»-ны салайбыта. Вячеслав Анатольевич салайар кэмигэр 1996 сыллаахха «Ньурбатааҕы» туруупка аһыллыбыта уонна «Юбилейнай» хайаны байытар кэмбинээт бастакы уочарата үлэҕэ киллэриллибитэ. Ангола Луанда куоратыгар, Бельгия Антверпеныгар уонна Великобританияҕа хампаанньа бэрэстэбиитэлистибэлэрэ аһыллыбыттара. Икки үйэлэр алтыһар кэмнэригэр «Мархатааҕы» туруупка, Анаабырдааҕы, Ньурбатааҕы хайаны байытар кэмбинээттэр тэриллибиттэрэ. 1998 сыллаахха «Анаабыр алмаастара» алын сүһүөх предприятиены аспыттара.
Владимир Калитин
2002 сыллаахха Вячеслав Штыров Саха Өрөспүүбүлүкэтин бэрэсидьиэнинэн талыллан, бэйэтин оннугар Амур уобалаһыттан төрүттээх, хампаанньа кылаабынай инженерэ Владимир Калитин кандидатуратын Кэтээн көрөр сэбиэккэ киллэрбитэ. Кэтээн көрөр сэбиэт чилиэннэрэ бары тутуспутунан Калитиҥҥа куоластаан, икки сыл сыл кэриҥэ бырамыысыланнай хампаанньа «уруулун» туппута. 2003 сыллаахха Ньурбатааҕы ГОК 16-с нүөмэрдээх сүрүн фабриката үлэҕэ киллэриллиитигэр бары күүһүн уурбута. Араас кээмэйдээх алмааһы атыылааһыҥҥа аан дойдутааҕы таһымнаах бастакы аукцион ыытыллыбыта.
Александр Ничипорук
2004 сыллаахха дойду бөдөҥ хампаанньатын салалтатыгар уларыйыы буолан, Александр Ничипоругу бэрэсидьиэнинэн талбыттара. Википедияҕа Александр Олеговиһы «Россия алмааһын хоруолунан» ааттаабыттар. Хомойуох иһин, алмаас хампаанньатын устуоруйатыгар кини бэйэтин туһунан үчүгэйэ суох өйдөбүлү хаалларан турар. Ол курдук, кини «Совкомбааҥҥа» 3,6 мөл. доллар иэскэ киирэн, онтун төлөөбөккө, баан ыксаан суукка биэрбит. Аны бу киһибит өссө «Мединторг» САУо-ҕа эмиэ илиилэри-атахтары иэскэ-күүскэ баайылла сылдьар эбит.
Александр Ничипорук «АЛРОСА»-ны салайан олорор кэмигэр, Архангельскай уобаласка алмааһы хостооһун саҕаламмыт итиэннэ Ангола Өрөспүүбүлүкэтигэр «Катока» ГРО иккис уонна «Камачия-Камажику» бастакы уочараттара тутуллубуттара.
Сергей Выборнов
«Алмаас хоруолун» кэнниттэн, 2007 сыллаахха олунньуга Сергей Выборнов кэлбитэ. 2008 сыллаахха Светлинскэйдээҕи ГЭС үһүс гидроагрегата үлэҕэ киллэриллэрин ситиспитэ. Эмиэ бу сыл сайыныгар «АЛРОСА» АХ эбии акция таһааран, устааптаах хапытаалы улаатыннарарга акционердарын кытта дуогабар түһэрсибитэ.
2009 сыллаахха «АЛРОСА» Кэтээн көрөр сэбиэтэ Сергей Выборновы астаапкаҕа ыыппыта. Ол биир төрүөтүнэн РФ бөдөҥ акционердара уонна Саха сирэ Выборнов алмаас сырьетун атыылыыры хааччахтааһыҥҥа олоҕурар бэлиитикэтиттэн астымматтара буолбута.
Федор Андреев
Выборновы «Россия тимир суоллара» ААУо старшай вице-президенинэн үлэлээбит Федор Андреев солбуйбута. Кини 2000 сыллар саҥаларыгар хампаанньаҕа бастакы вице-президент дуоһунаһыгар үлэлии сылдьыбыта.
2011 сыллаахха «АЛРОСА» аһаҕас акциялаах уопсастыбаҕа кубулуйан, акциялара үп-харчы ырыынагар көҥүл эргииргэ таһаарыллыбыттара. 2013 сыллаахха хампаанньа акцияларын 16% атыыланан, улахан аҥаарын АХШ инвестордара атыыласпыттара.
2014 сыллаахха Федор Андреев доруобуйатын туругунан сибээстээн, «АЛРОСА» бэрэсидьиэнин дуоһунаһыттан барарга быһаарыммыта.
Андрей Жарков
Андреев үлэтиттэн уурайбытын кэнниттэн, 2015 сыллаахха Кэтээн көрөр сэбиэт Женева куоракка төрөөбүт Андрей Жарковы кытары 3 сыллаах үлэ хантараагын түһэрсибитэ. Хантараак быһыытынан, Жарков 2018 сылга диэри үлэлиэхтээх этэ.
Жарков Росимущество «Алмазный мир» АУо акциятын атыылааһынын кытта сөбүлэспэтэх, аны 2017 сыллааҕы хампаанньа бүддьүөтүн быспыттарын аһаҕастык утарбыт. Сураҕа, хампаанньаны дьаһайар вице-премьер Юрий Трутневтыын эмиэ тыл-тылга киирсибэтэх диэн суруйаллар. Ол иһин уурайбыт диэн суруйаллар.
Сергей Иванов
Билигин «АЛРОСА» 36 саастаах Сергей Иванов илиитигэр киирдэ. Кини РФ Бэрэсидьиэнин дьаһалтатын салайааччыта буола сылдьыбыт Сергей Иванов уола. МГИМО выпускнига, СОГАЗ, «Газпромбаан» хампаанньаларга үлэлээбит.
Эбэн эттэххэ
Егор Борисов ааспыт ыйга Кэтээн көрөр сэбиэт бэрэссэдээтэлэ Антон Силуановы уонна саҥа ананыахтаах Сергей Иванову кытары көрсүһүү кэмигэр, «АЛРОСА» өрөспүүбүлүкэ олоҕор-дьаһаҕар улахан суолталааҕын, төһүү күүс буоларын бэлиэтээн турар. Онон, саҥа бэрэсидьиэни кытары өрөспүүбүлүкэ биир тылы булан үлэлиэҕэ диэн эрэниэххэ.
[vc_text_separator title=»» i_icon_fontawesome=»fa fa-quote-left» color=»blue» add_icon=»true»]Ыспыраапка
«АЛРОСА» хампаанньа алмааһы хостооһуҥҥа аан дойду ырыынагар инники күөҥҥэ сылдьарын бары билэ-көрө сылдьабыт. Ол туһунан элбэҕи суруйар, кэпсиир наадата суох дии саныыбын. Алмаас хампаанньата биһиги өрөспүүбүлүкэбит бүддьүөтүгэр сүрүн нолуок төлөөччүнэн, ол эбэтэр үгүс үбү-харчыны киллэрэр ханаалынан буолар. Бүгүҥҥү туругунан, хампаанньа 25%+1 акциятын Саха сирэ бас билэр. Оттон 33,03%-нын Россия Федерацията, 8,0003%-нын өрөспүүбүлүкэ аҕыс муниципальнай тэриллиитэ уонна 34%-на атын юридическай уонна физическэй сирэйдэр бас билиилэригэр сылдьар.
Ааспыт сыл төрдүс кыбаарталыгар хампаанньа алмааһы атыылааһынтан 849 мөл. доллар, оттон 2016 сыл түмүгүнэн. алмааһы уонна бриллианы батарыыттан 4,5 млрд доллар үбү-харчыны аахсыбыта.
Анивера Акимова, «Саха сирэ» хаһыат, https://edersaas.ru/