Өрөспүүбүлүкэтээҕи ХХII «Аҕа күрэҕэ – 2022» диэн улахан тэрээһин муус устар 2-3 күннэригэр Чурапчы улууһун Сылаҥ нэһилиэгэр ыытыллыаҕа. Бу улахан күрэхтэһиини СӨ Үлэҕэ уонна социальнай сайдыыга министиэристибэтэ иилээн-саҕалаан аҕа уонна уол оҕо күнүн көрсө сыл ахсын үгэс быһыытынан тэрийэр.
Хас сыл аайы аҕа күрэҕэ улахан болҕомтону ылар. Быйылгы күрэхтэһии Саха АССР 100 сылыгар уонна СӨ Ийэ сылыгар ананар. Хас биирдии улуустарга, араас нэһилиэктэргэ маннык күрэххэ кыытыллар буолбуттара кэрэхсэбиллээх. Аҕа оруолун дьиэ кэргэҥҥэ, уопсастыбаҕа үрдэтэр, ьиэ кэргэн үтүө үгэһин үйэтитэр, чөл олох холобурун тарҕатар соруктаах маннык куонкурустар ыытыллаллар.
Күрэхтэһии бастакы түһүмэҕэ номнуо улуустарынан уонна куорат иһинээҕи уокуруктарынан ыытыллыбыта. Онон Сылаҥҥа күрэхтэһии иккис түһүмэҕэ күүтүллэр.
Хамаандалартан сайаапканы кулун тутар 29 күнүгэр диэри ылаллар. Маны сэргэ, хамсыгынан сылтаан, күрэхтэһии буолуон иннинэ мэдиссиинэ үлэһиттэрэ кэлбит хамаандалары, ыалдьыттары көрөн-истэн баран кытыннарыахтара.
Кыттааччылар сэттэ түһүмэҕи ааһыахтара. Бэйэни, дьиэ кэргэни билиһиннэрии, маһы хайытан бэлэмнээһин, ойбон алларыы, остуолбоҕо ыттыы, кутаа оттуу. Быһата, саха эр киһитин, уол оҕотун бары өттүнэн тургутар көрүҥнэр киирбиттэр.
Үһүс миэстэни ылбыт хамаанда Чурапчы улууһун анал бирииһин тутуоҕа. Иккис миэстэни ылбыт аҕалаах уол матасыыкыланан наҕарадаланыахтара. Оттон бастакы миэстэҕэ тиксибит аҕалаах уо хамаандата квадроциклга тиксиэҕэ. Ону сэргэ, көхтөөх кыттыыны ылбыт хамаандалар СӨ “Үүнэр көлүөнэ тус сыаллаах пуондатыттан” уонна «Водоканал” АУО тэрилтэтиттэн, ону сэргэ СӨ аҕаларын лигатын анал бириистэригэр тиксиэхтэрэ.
Сиһилии куонкуруһу Чурапчыттан сырдатыахпыт.
Ульяна ЗАХАРОВА, «Саха сирэ» хаһыат