Дьокуускайга «Аҕа күрэҕэ» ыытылынна

Бөлөххө киир:

Кулун тутар 27 күнүгэр Дьокуускайга Сайсары күөлгэ “Аҕа күрэҕэ-2022”  түһүмэҕэ куорат 390 сылыгар уонна Саха АССР 100 сылыгар, Ийэ сылыгар ананан, бэһис төгүлүн ыытылынна.

Күрэхтэһиигэ Автодорожнай, Губинскай, Октябрьскай, Промышленнай, Сайсарскай, Строительнай, Киин уокуруктартан, Марха, Маҥан, Пригороднай, Табаҕа, Хатас, Тулагы-Киллэм сэлиэнньэлэртэн хамаандалар кытыннылар.

Киин куорат аҕа баһылыга Евгений Григорьев кыттааччылары эҕэрдэлээтэ:

Хас биирдии киһи олоҕор дьиэ кэргэнэ улахан суолталаах. Кини Киһи буолан улаатан, ситэн-хотон тахсарыгар, олох устун куорсун анньынан көтөрүгэр дьиэ кэргэнэ оруоллаах. Онон маннык күрэхтэһиилэр дьиэ кэргэн сыаннастарын бөҕөргөтөр, аҕа уонна уол оҕо биир ньыгыл буолалларын ситиһэр сыаллаах. Эр киһи айылҕатын быһыытынан, кыайар-хотор, күрэстэһэр, ситиһэр аналлаах. Сахалар былыр-былыргыттан күүстээхтэр күөн көрсүүлэрин, сымсалар киирсиилэрин биһириир этилэр. Онон бүгүҥҥү күрэхтэһиибит дириҥ суолталаах, киэҥ далааһыннаах, — диэн кини эттэ.

Урукку сылларга кыайыылаахтар спонсордар бириистэрин тутар эбит буоллахтарына, быйыл куорат дьаһалтата туруорбут бирииһин ыллылар. Кыайыылаахтар – 50 тыһыынча солкуобайы, 2-с миэстэҕэ – 30 тыһыынча солкуобайы, 3-с миэстэҕэ – 20 тыһыынча солкуобайы туттулар. Кыайбыт хамаанда муус устар 2-3 күннэригэр Чурапчы Сылаҥар буолар өрөспүүбүлүкэтээҕи «Аҕа күрэҕэр» кыттан, Дьокуускай куорат чиэһин көмүскүүр.

Өрөспүүбүлүкэтээҕи күрэхтэһиигэ улууска, куоракка кыайбыт хамаандалар кытта кэлэллэр. Хамаандаҕа аҕа уонна 14-16 саастаах уолун кытары бааллар. Икки күн устата хамаандалар сэттэ көрүҥҥэ күрэхтэһиэхтэрэ: дьиэ кэргэни билиһиннэрэр айар түһүмэх; бэрэбинэни суоруу; маһы хайытыы; ойбону алларыы; остуолбаҕа тахсыы; кутаа оттон, чэй бэлэмнээһин.

Евгений Григорьев саамай аҕа саастаах кыттааччыга –Промышленнай уокуруктан кыттыбыт Александр Ноевка анал бирииһин туттарда.

Бэлэмнэммит маһы барытын кыаммат ыалларга тиксэрдилэр.

Ангелина Васильева, «Саха сирэ» хаһыат, edersaas.ru

Хаартыска: yakutskcity.ru 

+1
0
+1
0
+1
0
+1
0
+1
0
+1
0
+1
0