Статистиканы ылан көрдөххө, сыллата судаарыстыбаннай кыраныыссаны туорааччылар ахсааннара улаатан иһэр. Араас омук барыта кэлэр. Дойдуларыгар чопчу тугунан дьарыктаммыттара биллибэт, туох ыарыылаах дьон кэлэрэ биллибэт. Өссө киһи кыһыйыах, «уоран» кэлэн саһа сылдьан үлэлииллэр.
Анивера АКИМОВА, «Саха сирэ», edersaas.ru сайт
Саха сиригэр ордук Сэбиэскэй Сойуус урукку өрөспүүбүлүкэлэриттэн кэлээччи элбэх. Үгүс дьон бырамыысыланнас эбийиэктэригэр, ол иһигэр тутуу, энергетика, ньиэп-гаас, атыы эргиэн салаатыгар үлэлии кэлэллэр. Ол курдук, миграннар үгүс бырыһыаннарын Кыргызстан, Таджикистан, Армения, Узбекистан, Казахстан, Украина олохтоохторо ылаллар. Маны таһынан, командировкаҕа, туристическай путевканан, сынньана кэлээччилэр эмиэ бааллар.
Официальнайдык кэлбит миграннар бары медицинскэй көрүүнү ааһаллар. Сыстыганнаах ыарыынан ыалдьыбыт дьоҥҥо патент, үлэҕэ киирэллэригэр көҥүл бэриллэрэ бобуулаах. Роспотребнадзор чахчыларынан, ааспыт сыллааҕы түмүгүнэн, өрөспүүбүлүкэ балыыһалара медицинскэй көрүүнү ааспыттарын туһунан ыспыраапканы 8294 миграҥҥа биэрбиттэр. Мантан Дьокуускай куоракка – 5499, улуустарга – 2795. Киһи доруобуйатыгар кутталлаах, сыстыганнаах ыарыынан ыалдьар омуктарга анал ыспыраапка бэриллибэт.
Анивера АКИМОВА, «Саха сирэ», edersaas.ru сайт