Уопсастыба

Зырянкаҕа култуура-спорт киинэ тутуллуоҕа

Алмаастаах хампаанньа «Үүнэр көлүөнэ пуондатын» нөҥүө Зырянка бөһүөлэккэ култуура-спорт киинин тутарга 300 мөлүйүөн солкуобайы көрдө. «АЛРОСА» өрөспүүбүлүкэ бүддьүөтүгэр нолуок төлүүрүн таһынан, олохтоох нэһилиэнньэ олоҕун тупсарарга үгүс социальнай бырайыактары үбүлүүр.

«АЛРОСА» генеральнай дириэк­тэрин солбуйааччы Алексей Дьячковскай: «Аныгы ирдэбилгэ толору эппиэттиир кииҥҥэ спортивнай уонна култуурунай тэрээһиннэр тэҥинэн ыытыллыахтара. Бу саҥа тутуу улууска успуорт, култуура сайдарыгар сүрүн тирэх буолуо. Олохтоохтор ыраах күрэхтэһиигэ бара сатаабакка, бэйэлэрин дойдуларыгар ыалдьыт­тары ыҥыран, араас тэрээһини ыытар кыахтаныахтара. Айар бөлөхтөр дьоро киэһэлэрин, спартакиада тэрийэргэ анал былаһаакка тутуллуо», — диэн билиһиннэрдэ.

Саҥа киин үс салаалаах, успуор­дунан дьарыктанар, эрчиллэр, суунар, уларыттар хос, 214 миэстэлээх тырыбына, кулууп өттүгэр 212 миэстэлээх көрөөччү саалата, итиэннэ үҥкүүһүттэр дьарыктанар хосторо, киинэ көрдөрөр сир, бибилэтиэкэ уонна дьаһалта хосторо баар буолуохтара. Саҥа уораҕай 2000 кв.м. иэннээх, тутуу ороскуота 278 мөлүйүөн солкуобай.

Билиҥҥи туругунан, кулууп, спортивнай саала иккис этээскэ диэри эркинэ бүтэн, ол икки ардыгар көрүдүөр, көрөөччү саалата, пандус, үктэл оҥоһуллубут.

Марианна Тыртыкова, «Саха сирэ» хаһыат, edersaas.ru

0
0
Telegram @edersaas20

Добавить комментарий