Зоя Шартан-Оол: «Арассыыйа норуоттарын уратыларын көмүскүүр»...
Олох-дьаһах

Зоя Шартан-Оол: «Арассыыйа норуоттарын уратыларын көмүскүүр»

От ыйын 1 күнүгэр Арассыыйа үрдүнэн дойду Төрүт сокуонугар көннөрүүлэри киллэриигэ куоластааһын ыытыллаары турар. Манна Дьокуускай куоракка «Тыва» национальнай община» уопсастабыннай түмсүү бэрэсидьиэнэ Шартан-Оол Зоя Хоюг-Ооловна УлусМедиаҕа санаатын үллэстибитин билиһиннэрэбит.

– Хас биирдии норуот өбүгэ саҕаттан иҥэринэн, харыстаан илдьэ кэлбит култуурата, тыла-өһө, кини уратыта, муудараһа тыһыынчанан сыллары уҥуордуур. Маныаха дойду Төрүт сокуонун 69-с ыстатыйатыгар көннөрүүлэри киллэрии Арассыыйа норуоттарын уратыларын көмүскүүрүн көрдөрөр. Бастакы уочарат норуот тыла-өһө. Биһиги бары билэбит, «тыл баар — омук баар» диэн бэртээхэй бэргэн этиини. Итинтэн да көстөрүнэн, төрөөбүт тылы, норуоппут үгэһин, сиэрин-туомун харыстаан илдьэ сылдьыы, кэнчээри ыччакка тиэрдии, иҥэрии, бу биһиги хас биирдиибит олус улахан эппиэтинэһэ буоларын өйдүөх тустаахпыт.

Маны сэргэ, тас дойдуга олорор биир дойдулаахтарбытын өйөөһүнү биһириибин. Мин Туваттан төрүттээхпин. Ол да буоллар, Саха сирин иккис төрөөбүт дойдубунан ааттыыбын. Манна биһиги дьиэ кэргэн олоробут. Оҕолорум, сиэним манна күн сирин көрбүттэрэ. Мин кинилэр төрөөбүт тылларын, үгэстэрин  билиэхтэрин баҕарабын. Биһиги өрөспүүбүлүкэбитигэр бары норуоттар олус иллээхтик доҕордоһон олороллор уонна бары бэйэлэрин төрөөбүт норуоттарын үгэстэрин ытыктыыллар, кэнчээри ыччаттарыгар иҥэрэллэр. Дьокуускайга А.Е.Кулаковскай аатынан норуоттар доҕордоһууларын дьиэтэ  араас национальностар бэрэстэбиитэллэрин түмэр. Биһигини бука барыбытын доҕордуу сыһыан, өйдөһүү сомоҕолуур. Төрүт сокуоҥҥа бу көннөрүү норуоттар уратыларын харыстыырыгар уонна биир дойдулаахтарбытын өйүүргэ улахан көмөлөөх буоларыгар эрэнэбин.

2
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

девятнадцать − двенадцать =