Нерюнгри оройуонун Иенгратыгар «Золотинка» МУТ килиэккэлээх кыылы иитэр былаһаакката арылынна.
edersaas.ru
Былырыын баччаларга Арктика дьыалаларыгар судаарыстыбаннай кэмитиэт бэрэссэдээтэлэ Прокопий Николаев Нерюнгрига тиийэ сырыттаҕына, оройуон баһылыга Виктор Станиловскай сопхуос саҕана, 1950—1960-с сылларга, тутуллубут «Золотинка» МУТ кыылы иитэр пиэрмэтин базатын саҥардыыга көмөлөһөргө туруорсубута.
— Арктика судаарыстыбаннай кэмитиэтин кытары түһэрсиллибит сөбүлэһии быһыытынан үп көрүллэн, кыыл пиэрмэтигэр былаһаакка бэриллэн, саҥа щедтэр оҥоһулуннулар. Онон үлэлиир усулуобуйа төрдүттэн тупсарыллан, кэлэр өттүгэр кыыл ахсаана элбэтиллиэ, эбии үлэ миэстэтэ тахсыа, ону кытары даҕаспытынан бородууксуйаны батарыы даҕаны кэҥэтиллиэ, — диир хаһаайыстыба дириэктэрин солбуйааччы Ньургун Владимиров.
Билигин хаһаайыстыба 400 хара саһыллаах, ол иһиттэн 320 ийэ кыыллаах, итиэннэ ааспыт ыйга Тверьтэн аҕалыллыбыт отут киистээх. Бу киистэри аҕалыы эмиэ былырыын түһэрсиллибит сөбүлэһии чэрчитинэн ситиһиллибит. Базаны саҥардыыга өрөспүүбүлүкэ бүддьүөтүттэн көрүллүбүт үпкэ оройуон үс мөлүйүөнү биэрбит, хаһаайыстыба икки мөлүйүөнү укпут. Оттон Тверьтэн киистэри атыылаһан аҕаларга 5 мөл. солк барбыт, ол 80 %-ын Арктика судаарыстыбаннай кэмитиэтэ уйуммут. Саҥа килиэккэлэргэ ол киистэри кытары 150 хара саһыл туруорулунна.
Килиэккэлээх кыылы иитэр саҥа былаһаакканы арыйыы дьоро күнүгэр сөп түбэһиннэрэн, өрөспүүбүлүкэҕэ килиэккэлээх кыылы иитии уопутун уонна кэскилин туһунан эрэгийиэннээҕи научнай-практическай форум ыытылынна. Онно тыа хаһаайыстыбатын миниистирин солбуйааччы Прокопий Николаев, Нерюнгри оройуонун баһылыга Виктор Станиловскай, Тыва Өрөспүүбүлүкэтин тыатын хаһаайыстыбатын миниистирин солбуйааччы Юрий Оруспай, Тверь уобалаһыттан Саха сирин кыылы иитэр хаһаайыстыбаларын кытары утумнаахтык үлэлиир “Савватьево” кыылы иитэр племенной собуот бэрэстэбиитэллэрэ уо.д.а. кыттыыны ыллылар.
Золотинкалар кэлэр сылларга кыыл боруодатын тупсарыыга күүскэ үлэлиир былааннаахтар. Онон форумҥа Тыа хаһаайыстыбатын министиэристибэтин кытары түһэрсиллибит сөбүлэһии сайдыы саҥа саҕаҕын арыйыа диэн эрэнэллэр.
Анна СЕРГУЧЕВА, «Саха сирэ» хаһыат, edersaas.ru сайтыгар анаан