«Зодчество 2021» түһүлгэтигэр — Саха сирэ

Далааһыннаах тэрээһин алтынньы 1-3 күннэригэр «Гостиный двор» быыстапкалыыр комплекска ыытыллар. Тэрийээччилэр РФ архитектордарын холбоһуга. Бу туһунан Москваҕа СӨ Бастайааннай бэрэстэбиитэлистибэтин саайтыгар суруллар.

Далааһыннаах тэрээһин сыл ахсын ыытыллар. Бу архитектураҕа уонна куораты тутуу хайысхатыгар туһуланар улахан түһүлгэнэн буолар. «Арассыыйа эрэгийиэннэрэ» көрүү-куонкуруска  РФ 15 субъегыттан кытталлар.

СӨ Ил Дархан архитектураҕа уонна куораты тутууга управлениета Саха сирин архитектордарын холбоһугун кытта бииргэ «Үүнэр көлүөнэ тус сыаллаах пуондатын» өйөбүлүнэн сири-уоту сайыннарыыга бастыҥ бырайыактарын, олоххо киллэриллибит, тутуллар уонна былааннанар социальной инфраструктура эбийиэктэрин; табыгастаах уонна тупсарыллыбыт эйгэни тэрийиигэ туһуламмыт үлэлэри, о.д.а. билиһиннэрэр. Бэлиэтээн эттэххэ, Саха сирин архитектордара сыл ахсын бэстибээлгэ бырайыактарынан ситиһиилээхтик кытталлар. Саха сирэ далааһыннаах тэрээһиҥҥэ 2016 сылтан кыттыыны ылбыта. Онно «Региональные и муниципальные мероприятия»  анал аакка «Политика пространственного развития» салааҕа «ГРАДОУСТРОЙСТВО» көрүү-куонкурус Кыһыл көмүс бэлиэтин хаһаайынынан буолбута.

Быйылгы бэстибээл тиэмэтэ «Истина». Бу куратор Алексей Комов этии киллэриитинэн ылыныллыбыт уонна архитектураҕа, куораты тутууга аныгы хабааны көрдөөһүн, булуу буолар. Архитектура уонна куораты тутуу управлениета үлэтин иитинэн, саҥа форматтаах бырайыактары быраактыкаҕа киллэрбит. Бу маастар-былааннар, дьон олохсуйбут сирдэрин дизайн-кодтара, култуура эбийиэктэрин тупсаран оҥоруу бырайыактара, о.д.а. Саҥа ураты көрүүлэр, сүүрээннэр, уларытыылар. Экспозицияҕа Саха сиригэр олоххо киллэриллибит, былааннаммыт бырайыактар бааллар, ол курдук, холобур, култуура, доруобуйа харыстабылын эйгэтигэр үлэлэртэн, ураты баараҕай эбийиэктэр, эпос уонна ускуустуба Арктикатааҕы киинэ, үөрэх эйгэтин эбийиэктэрэ, ол иһигэр Хаҥалас улууһугар Өктөмҥө аныгы оскуола-саад, о.д.а. Дьокуускайга «Звезднай» түөлбэ, Өлүөнэ эбэни туоруур муоста Саха сирин дьоно-сэргэтэ олус долгуйа, эрэнэ кэтэһэр бырайыактара, о.д.а. болҕомтону тардаллар.

Бэстибээл бырагыраамата киэҥ. Тэрээһин иитинэн РФ субъектарын уонна муниципальнай тэриллиилэрин сүрүн архитектордарын сэбиэтин мунньаҕа ыытыллар. Мунньахха СӨ сүрүн архитектора Ирина Алексеева, Дьокуускай куорат кылаабынай архитектора Семен Сергеев кытталлар. Итини сэргэ, «Арктический стандарт как инструмент. Возможен ли комфорт среды в климатическом дискомфорте?» сиэссийэҕэ архитектура управлениета кыттыыны ылар.