Зиновий Игнатьев: «Холкутук олорон, кэскилбитин толкуйдуоҕуҥ»

Ааптар: 
Бөлөххө киир:

Бу күннэргэ Украинаҕа буола турар быһыыны-майгыны бары көрө-истэ, билэ сылдьабыт.

Дьон санаатын араастык этинэр, толкуйдуур, анаарар. Кэрэхсэбиллээҕэ баар, үгүс киһи РФ Бэрэсидьиэнэ Владимир Путин ыытар бэлиитикэтин өйүүр.

Мэҥэ Хаҥалас улууһун уопсастыбанньыктарын үлэлэрин сүрүннээччи, алгысчыт Зиновий Игнатьев санаатын бу курдук үллэстэр:

— Сэбиэскэй кэмҥэ үөрэммит, үлэлээбит буолан, украинецтары уонна да атын туспа барбыт омуктары араара барбат этим. Аармыйаҕа украинец, белорус, армянин, азербайджанец, казах, узбек уолаттарын кытта бииргэ икки сыл сулууспалаабытым. Оччолорго омугунан арахсыы олох суоҕа.
Кэлин Украина ыытар бэлиитикэтэ, Бандераны национальнай дьоруой оҥоруулара, православнай таҥара дьиэлэрин эһиилэрэ, нуучча тылын бобуулара — барыта былааска олох атын өйдөөх-санаалаах дьон кэлбиттэрэ дьиксиннэрэрэ. Аны эйэлээх ДНРы, ЛНРы сэриилииллэрэ,  бу славян омук бэйэтин иһигэр атаан таһаарыыга ыраахтан сыаллаах оҥоһуллара биллэр этэ. «Минскэй дуогабар «тугу эмэ көннөрүө дии санаабытым да, Украина салалтата ылымматаҕа көстөн таҕыста. Онон Украинаҕа фашизмы төрдүттэн түөрүү олох наада диэн олоробун уонна РФ бэрэсидьиэнин Владимир Путины, байыаннайдары өйүүбүн.
Оттон сааҥсыйа биллэрбиттэрэ биһиэхэ, саастаах, талымаһа суох дьонҥо син биир. Бэйэбит эппитин, үүппүтүн, хортуоппуйбутун сии олорбуппут курдук олоруохпут. Ол бу интэриниэт ситимэ барарыгар олох кыһаллыбаппын, хата хоп-сип аҕыйыа. Ыччаттарга, туһанар дьонҥо куһаҕан буолуо да, Арассыыйа ону да солбуйар кыахтаах. Онон хараастан ытыыр наадата суох.
Мин, алгысчыт буоларбынан,биири баҕарабын — аймахтар бииргэ тутуһан, түөлбэлэр,  нэһилиэктэр түмсэн, үлэ сонун хайысхаларын киллэрэн иһиэхтэрин. Уустук кэмҥэ ыксаабакка, ыгылыйбакка, холкутук олорон кэскилбитин толкуйдуоҕуҥ. «Евростандарт» дэнэр үөрэхтэртэн аккаастаныаҕыҥ — ОГЭ, ЕГЭ, «Меркурий» диэннэрэ тохтоон, бэйэбит стандарпытыгар төннөрбүтүгэр баҕарабын. Маныаха Арассыыйабыт бэрэсидьиэнэ Владимир Путин ыытар бэлиитикэтэ толору сөп түбэһэр.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0