Бу күннэргэ Ил Дархан Айсен Николаев Анал этиитин Саха сирин олохтоохторо киэҥник ырыталлар, анаараллар.
edersaas.ru
Мэҥэ Хаҥалас улууһун уопсастыбаннай тэрилтэлэрин үлэлэрин сүрүннүүр Зиновий Игнатьев тус санаатын бу курдук үллэстэр:
— 2020 сылы түмүктүүр туһаайыытыгар Ил Дархаммыт Саха сирин олохтоохторун олохторун хаачыстыбатыгар тупсуутугар анаммыт туох үлэ ыыталларын сиһилии ырытта, стратегическай суолталаах тосхоллору торумнаата.
Аҕа баһылык Айсен Николаев бу эппитин барытын биһиги бэйэбит олохпутугар көрөн-истэн билэбит. Ол курдук, ыраата барбакка, мин аҥардас Мэҥэ Хаҥалас улууһун бүгүҥҥү күннээх сонунун билиһиннэриим. Төрөөбүт дойдубут Мэҥэ сирэ сайдар оҥкулугар үйэ саас тухары тирэх буолар устуоруйаҕа көмүс буукубаларынан суруллар умнуллубат кэрэ түгэннэри бэлэхтиир үтүө күн үүннэ. Ырыаҕа хоһуллар тапталлаах Майабытыгар хас да сылы быһа олохтоохтор ыра оҥосто сылдьыбыт Култуурабыт дыбарыаһа,
улууспут киинигэр Аллараа Бэстээххэ дьон олус күүтэр икки харбыыр аныгы оҥоһуулаах бассейыннаах успуорт хыраама,
Майаҕа уонна Аллараа Бэстээххэ элбэх кыбартыыралаах олорор дьиэлэр, сарсын Балыктаахха Оҕо саас уонна Билии уйата – таас оскуола арыллаары тураллар.
Маннык тэтимнээх сайдыыны олоххо киллэрии бэтэрээнэн дьыала буолбатаҕа чахчы. Бу — биһигини кытта балысхан сайдыы аргыстаһарын бэлиэтэ.
Улуус дьоно-сэргэтэ барҕа махталбытын Ил Дархаммытыгар Айсен Николаевка, улуус баһылыгар Николай Старостиҥҥа уонна бары көмөлөспүт, өйөөбүт министиэристибэлэргэ, биэдимистибэлэргэ, тэрилтэлэргэ тиэрдэбит!
Быйылгы уустук сыл түмүгэ улуус аайы олус үчүгэй сонуннардаах, дьоһуннаах тутууларынан бэлэхтээх түмүктэнэн эрэрэ, кэлэр сылга туох барыта табыллар, сатанар билгэтин курдук ылыныаҕыҥ, доҕоттор! Кэлэн иһэр Саҥа дьылынан!
Елена ПОТОЦКАЯ, «Саха сирэ» хаһыат, edersaas.ru
Хаартыска социальнай ситимнэртэн.