Зиновий Игнатьев: «Бэйэ-бэйэни өйөһүү — олох ирдэбилэ»

Ааптар: 
Бөлөххө киир:

Сыстыганнаах дьаҥ кэмэ дьон өйүн-санаатын тосту уларытта — олоххо тардыһыы күүһүрдэ.

Бу туһунан Мэҥэ Хаҥалас улууһун Майа сэлиэнньэтин «Сырдык Айыы сыдьаайа» саха итэҕэлин тарҕатааччылар түмсүүлэрин алгысчыта Зиновий Игнатьев санаатын үллэстэр:

— Сыстыганнаах дьаҥ кэмигэр үгүс киһи бэйэтэ улаханнык ыалдьан, чугас дьонун бу кутталлаах ыарыы кэмигэр сүтэрэн, санаата-оноото тууйулунна, уйулҕата хамсаата. Ол иһин да буолуо, биһиги дьону арчылыыр балаҕаммыт аана сабыллыбат буолла — үгүс киһи санаатын сайҕана, арчылана кэлэр. Мин бу уустук кэми этэҥҥэ аһарынарбытыгар өрөспүүбүлүкэбит салалтата биһигини, Саха сирин олохтоохторун кытта бииргэ буолан, суһал ыстааптартан иһитиннэриилэри хоиуйан иһитиннэрэ-билиһиннэрэ олорбутун бэлиэтиэхпин баҕарабын.  Бырабыыталыстыба бэрэссэдээтэлин солбуйааччы Ольга Балабкина маныаха улахан үлэни ыытан, дьону-сэргэни уоскутар тыллары булан, күн аайы балаһыанньаны билиһиннэрэ олорбутун ааһан, өрүү  бэйэтин түмүк этиитигэр «бэйэҕитин уонна чугас дьоҥҥутун харыстааҥ» диирэ дьон сүрэҕэр олус истиҥник киирэрэ. 

Ол да иһин буолуо, мин саха дьонун аатыттан махтал тылларын этээри Ольга Валерьевнаҕа көрсүһүүгэ анаан  суруйтаран, атах тэпсэн олорон кэпсэтэн таҕыстым. Сыыйа саха итэҕэлигэр тиийдибит. Улахан салайааччы  сахалыы алгыһы сэҥээрэрин, бэйэтин «якутянкабын» дэнэрин олус чугастык ылынным. 
Ольга Валерьевна ийэтэ Бүлүүттэн төрүттээх эбит.  Алгыһы бэрт истиҥник сэҥээрбитин иһин Майаҕа тигинэччи үлэлии турар саха балаҕаныгар кэлэ сылдьарыгар ыҥырдым. Онуоха кини бэйэтин үлэтин аттарынан, хайаан да тахсан билсэ сылдьыах, көрүөх буолла.
Олус уустук кэмҥэ олоробут. Онон билигин хас биирдии дьиэ кэргэн, аймах бииргэ тутуһан, бэйэ-бэйэҕэ көмөлөсүһэн олоруу — бүгүҥҥү олох ирдэбилэ. Бар дьоммор үтүөнү баҕаран туран, алгыспын тиэрдэбин:

Үктэммит сиргититтэн
Үкэр күөх от үүннүн,
Атыллаабыт сиргититтэн
Ача күөх от аҥаарыйдын.

Тохтообут сиргититтэн
Торҕо күөх от торолуйдун.
Сиэттиспит сиргитигэр
Сирэм күөх от сириэдийдин,
Тахсан эрэр күн саһарҕата
Эһигини саппаҕырпатын,
Киирэн эрэр күн килбиэнэ
Эһигини киртиппэтин!

Елена ПОТОЦКАЯ, «Саха сирэ» хаһыат. 

+1
0
+1
0
+1
0
+1
0
+1
0
+1
0
+1
0