Сахалар «Жикина шареница» диэн Сербия биэриитигэр ыалдьыттаатылар

«Биир толкуй» норуоттар икки ардыларынааҕы литературнай-историческай бырайыак чэрчитинэн Сербияҕа «Жикина шареница» диэн биэрии уһулунна. Бу биэрии Арассыыйаҕа «Пусть говорят» курдук элбэх көрөөччүлээх. Эрдэ устан баран кэнники көрдөрөллөр эбит, онуоха тыыннаах оркестр доҕуһуоллуоҕа.

Саха сирин делегацията кыттыыны бары ыллыбыт. Аан бастаан өрөспүүбүлүкэбит туһунан СӨ Тас сибээскэ уонна норуоттар дьыалаларыгар миниистири солбуйааччы Владимир Васильев кэпсээтэ. Онтон сүрүн дьоруойдарынан артыыстар буоллулар. Саха сирин үтүөлээх артыыһа, Олоҥхо театрын үлэһитэ Александр Дьячковскай – Саарын сахалыы уонна сиэрбтии ылбаҕай ырыалары ыллаабытыгар көрөөччүлэр туран эрэ ытыс дохсун тыаһын бэлэхтээтилэр. Эстрада театрын артыыһа Алена Яковлева аҕатын репертуарыттан олус долгутуулаах ырыаны ыллаан, дьоро киэһэ биир чаҕылхай «сулуһа» буолла. Умнуллубат ураты нүөмэри С.А.Зверев-Кыыл Уола аатынан Национальнай үҥкүү театрын солиһа, Саха сирин народнай артыыһа, РФ үтүөлээх артыыһа Дмитрий Артемьев бэлэмнээн элбэх киһи сэҥээриитин ылыан ылла.

Биэриигэ Өксөкүлээх Өлөксөй сиэннэрэ Раиса уонна Лариса Кулаковскаялар, «Киэргэ» тэрилтэ дириэктэрэ Александр Павлов, Саха сирин народнай худуоһунньуга, скульптор Афанасий Романов кэргэнин кытта уонна да атыттар ыалдьыттаатылар. Онон олус истиҥ-иһирэх, сонун, сэргэх кэпсэтии буолла.

Сардаана Сыромятникова,

«Саха сирэ» хаһыакка, edersaas.ru саайтка анаан.