Жатайга суудунаны тутар собуот атаҕын түһэриигэ Арассыыйа бырамыысыланнаска миниистирэ кэлиэҕэ
Муус устар 25 күнүгэр Жатайдааҕы суудуна верфэтин бастакы атаҕын (сыбаайатын) түһэрии былааннанар. Ол тэрээһиҥҥэ Арассыыйа бырамыысыланнаска уонна эргиэҥҥэ миниистирэ Денис Мантуров кэлэрэ күүтүллэр.
“Саха сиринээҕи агломерация сиригэр-уотугар үрдүк технологиялаах аныгы суудунаны тутар собуот тутуллуоҕа. Жатайдааҕы суудуна верфэтэ – судаарыстыба суотугар тутуллар икки верфэттэн биирдэстэрэ. Бу бырайыакка салалта өттүттэн болҕомто күүстээх. Эбийиэк сылга өрүс 10 суудунатын тутар, флоту саҥардар кыаҕы биэриэҕэ. Иккис түһүмэҕи олоххо киллэрдэхпитинэ, суудуналары саҥардар уонна эргэрбити харайар кыахтаныахпыт, ити олус улахан суолталаах. Арктикатааҕы норуоттар икки ардыларынааҕы форум кэмигэр, Санкт Петербурдааҕы суудунаны тутааччылары кытта түһэрсиллибит сөбүлэһиилэргэ олоҕуран, Жатайдааҕы суудуна верфэтин үлэҕэ киллэриигэ сөптөөх каадырдарынан хааччыллыахпыт диэн эрэнэбин”, — диэтэ муус устар 18 күнүгэр сонуннары киэҥник тарҕатар судаарыстыбаннай сириэстибэлэр эрэдээктэрдэрин кытта көрсүһүүгэ Саха сирин Ил Дархана Айсен Николаев.
Санатан эттэххэ, Жатайдааҕы суудуна верфэтин Саха сирин салалтата “Хаҥалас” ТОР-га киллэрэр баҕалаах. Бу тэрилтэҕэ түһээн ноҕуруускатын аччатыаҕа. Эбийиэк 2021 сыл бүтүүтэ үлэҕэ киириэхтээх.
СИА.