Жатайга өрүс аалларын тутар собуот 2022 сылга бастакы хараабылы таһаарыа
Бүгүн, муус устар 26 күнүгэр, Сахабыт сирин историятыгар биир кэрэ-бэлиэ түгэн тосхойдо. Ол курдук, Жатайдааҕы өрүс аалларын тутар, өрөмүөннүүр үрдүк технологиялаах собуот тутуутун бастакы атаҕын түһэрии сиэрэ-туома ыытылынна. Христианскай итэҕэл сиэринэн Саха сирин архиепискоба Роман бастакы сыбаайаны сибэтиэй уунан ыһан, саҥа собуот тутуллар сирин ыраастаата уонна алҕаата.
edersaas.ru
РФ Атыыга-эргиэҥҥэ уонна бырамыысыланнаска миниистирэ Денис Мантуров: «Собуот тутуутугар 5 миллиард солкуобай кэриҥэ үбү угуохпут. Федеральнай бүддьүөттэн 4 миллиард киириэ, онтон быйыл тутууну саҕалыырга 550 мөлүйүөнэ түһүө. 2021 сылга аныгы олох ирдэбилигэр эппиэттиир собуот тутуллан, үлэҕэ киириэхтээх. Өлүөнэ, Яна, Халыма өрүстэринэн таһаҕаһы уонна дьону таһар, итиэннэ тупсаҕай көрүҥнээх туристическай суудуналары манна оҥоруохтара. Сылга уоннуу уу тырааныспара собуоттан кутуллан тахсыаҕа. Эргэ суудуналары тимир луомугар туттардахтарына, субсидиянан, чэпчэтиилээх лизининэн туһаныахтара. Ону таһынан, собуокка саҥа үлэ миэстэтэ тэриллиэ, конструктордары, инженердэри, механиктары дойду хотугулуу-арҕаа үөрэх кыһаларыгар үөрэтиэхпит», — диэтэ.
Ил Дархан Айсен Николаев: «Өрүс флота сайдарыгар собуот тутуута сүрүн тирэх буолуо. Уһук хоту дойдубутугар уу тырааныспара саҥардыллыбатаҕа ыраатта. Суудуналар орто саастара 34. Онон икки сылынан сылга уоннуу устар аалы оҥорор собуот тутуллара барыбытыгар үөрүүлээх түгэн. 2022 сылга өрөспүүбүлүкэ төрүттэммитэ 100 сылын көрсө, Жатайдааҕы собуоттан бастакы хараабыл ууга тахсыа», — диэн эрэнэрин биллэрдэ.
Хотугу муора суолугар киирэр өрүстэринэн кылгас кэмнээх навигация үлэтэ тупсарыгар, флот саҥардылларыгар, собуокка 700 үлэ миэстэтэ тэриллэригэр, олохтоох экэниэмикэ сайдарыгар бастакы акылаат уурулунна.
Марианна ТЫРТЫКОВА, «Саха сирэ» хаһыат, edersaas.ru