Жатайга мехатроника уонна робототехника мастарыскыайа аһылынна

Бөлөххө киир:

Жатайдааҕы техникумҥа түөрт хайысхалаах мастарыскыай аһылынна.

Ол курдук мобильнай робототехника, мехатроника, автоматика релейнэй тэрилин өрөмүөннүүр уонна тимир суудуналар куорпустарын хомуйуу  мастарыскыайдара. Мастарыскыай өҥөтүнэн техникумтан өрөспүүбүлүкэҕэ сатабыллаах, үрдүк таһымнаах каадырдар үүнэн тахсыахтара.

Жатайдааҕы судоверфэҕэ эмиэ үлэлиэхтэрин сөп. Мастарыскыайдар «Эдэр профессионаллар» федеральнай бырайыак уонна «Үөрэҕирии» национальнай бырайыактар чэрчитинэн тэриллибиттэр. Мастарыскыай аныгылыы көмпүүтэринэн лабораториялаах. Маннык лабораторияҕа үрдүк  таһымнаах исписэлиистэри уһуйан таһаарарга бары усулуобуйа баара бэлиэтэнэр. Өрөспүүбүлүкэҕэ ханнык социальнай-экэнэмиичэскэй соруктар туралларынан мастарыскыай үлэлиир, оҥорон таһаарар хайысхата туһуланар. Быһата, каадыры бэлэмниир биир сүрүн бырамыысыланнай кыһа. Үөрүүлээх күнүнэн Жатай техникумун кэлэктиибин СӨ бырабыыталыстыбатын бэрэссэдээтэлин солбуйааччы Дмитрий Садовников эҕэрдэлээтэ.
«Бүгүҥҥү күҥҥэ өрөспүүбүлүкэ сүрүн соругунан оробуочай идэни баһылыырга сорук туруорар. Жатай техникума бэйэтин сүнньүнэн борохуокка, Жатайдааҕы судоверфэҕэ 600 кэриҥэ үлэ миэстэтэ тахсыаҕа. Онон бу мастарыскыайдар тэриллиилэрэ кэскиллээх», — диэн эттэ Дмитрий Садовников. СӨ Тырааныспарын уонна суол хаһаайыстыбатын миниистирин солбуйааччы Сергей Владимиров бэлиэтииринэн, Жатайдааҕы техникум өрөспүүбүүкэҕэ тырааныспар салаатыгар каадыры бэлэмниир сүрүн кыһа буолар.
«Биһиэхэ сыл ахсын өрүскэ сыһыаннаах тэрилтэлэргэ каадыр тиийээччитэ суох. Мастарыскыай арыллыыта каадыры үүннэриигэ көмөлөөх буолуоҕа. Сотору кэминэн өрөспүүбүлүкэҕэ техникуму бүтэрбит бэйэбит оҕолорбут үлэлиэхтэрэ», — диэтэ.
Техникум дириэктэрэ Леонид Шибаев: «Биһиги техникуммут инникитин үөрэ-көтө көрдөрөбүт, биһигини кытта үлэлэһэр партнердарбыт Жатайдааҕы собуот уонна үрдүк технологичнай таһымнаах судоверфи буолар. Номнуо үс сылынан оҕолорбут идэлэрин баһылаан улахан тэрилтэлэргэ үлэлиэхтэрэ». Кини иһитиннэрбитинэн, мастарыскыайга үөрэниэн сөптөөхтөр сүүмэрдэммиттэр учууталлар талыллан мастарыскыайга хайдах үлэлиир үөрэҕи ааспыттар. Ол курдук 100 устудьуон саамай наадалаах хайысхаларга үөрэнэ кэлбиттэр.
Маны сэргэ, мастарыскыай аһыллыытыгар суудуналары өрөмүөннүүр собуот дириэктэрэ Виктор Шадрин уонна үөрэх миниистирин солбуйааччы Михаил Присяжнай сырыттылар. Үөрүүлээх тэрээһин түмүгэр техникум үлэһиттэригэр махтал суруктары туттардылар.

Ульяна ЗАХАРОВА, edersaas.ru

+1
0
+1
0
+1
0
+1
0
+1
0
+1
0
+1
0