Атырдьах ыйын 21 күнүгэр ОДьКХ уонна энергетика миниистирэ Дмитрий Садовников Жатайга кирдээх ууну ыраастыыр ыстаансыйаны тутууга анаммыт сүбэ мунньаҕы ыытта.
edersaas.ru
Жатай дьаһалтатын, «Водоканал» АУо уонна бэдэрээтчит «Сахастрой 2002» тутуу хампаанньата» ХЭТ салалталарын иһитиннэриилэринэн, билигин бөһүөлэккэ кирдээх ууну ыраастыыр саҥа ыстаансыйа тутуллар сирэ күрүөлэнэ сылдьар итиэннэ эбийиэги былааннааһын үлэтэ саҕаламмыт. Бу сыл бүтүөр диэри тутар-таҥар үлэ нулевой цикла бүтэриллиэхтээх итиэннэ аны икки сылынан саҥа ыстаансыйа үлэ киллэриллиэхтээх. Сууккаҕа 1500 куб кирдээх ууну ыраастыыр кыамталаах саҥа ыстаансыйаҕа 1971 уонна 1986 с. тутуллубут эргэ ыстаансыйа дьиэлэрэ сөргүтүллэн оҥоһуллаллар.
Бырайыак Саха Өрөспүүбүлүкэтин, «Жатай» куораттааҕы уокурук, «Жатайтеплосеть» МУТ уонна «Водоканал» АУо концессионнай сөбүлэһиилэринэн оҥоһуллар. Уопсай сыаната 420 мөл. солк., итинтэн 251 мөл. солк. ОДьКХ реформатын пуондата үбүлүүр, өрөспүүбүлүкэ бүддьүөтүттэн, олохтоох дьаһалтаттан, «Водоканалтан» эмиэ үп көрүллэр. Бу бырайыак Саха Өрөспүүбүлүкэтин Ил Дархана Айсен Николаев экология өттүнэн куттал суох буолуутугар туһуламмыт Ыйааҕын чэрчитинэн олоххо киллэриллэр диэн Ил Дархан уонна Бырабыыталыстыба пресс-киинэ иһитиннэрэр.
Раиса Сибирякова, «Саха сирэ» edersaas.ru