Субуота күн «109» оптуобуска олорон, Жатайга айаннаатым. Бу диэки тыа сириттэн көһөн кэлээччи элбээбит. Куорат чугаһа, суола үчүгэйэ, дьиэ- уот сыаната чэпчэкитэ үгүс киһини угуйар.
Намныыр айан суолуттан киирэн истэххэ, Сатал микрооройуон утары сабыс-саҥа иккилии мэндиэмэннээх кэтэх дьиэлэр кэчигирэспиттэр. «Манна бүддьүөт үлэһиттэригэр уонна элбэх оҕолоох ыалларга уоттаах, гаастаах, кыһыннары-сайыннары киин ситимтэн уулаах босхо учаастактары түҥэппиттэрэ», — диэн кэпсииллэр Жатай олохтоохторо. Онон ыаллар септик туруоран, куораттыы толору хааччыллыылаах дьиэҕэ олороллор, аныгы олох сиэринэн, куукунаҕа иһит сууйар массыыналаахтар. Үгүстэр эдэр ыалга бэриллэр субсидиянан, ийэ хапытаалын туһанан, босхо кэриэтэ дьиэ туттубуттар.
“ӨЙДӨӨХ ДЬИЭ”
Холобур, Жатайга 1 хостоох толору хааччыллыылаах кыбартыыра 1,6 мөлүйүөн солкуобай, 2 хостоох 2-2,5 мөлүйүөн, 3 хостоох 3-3,5 мөлүйүөн солкуобай. Кыһын массыына турар сылаас гарааһа – 450 000 солкуобай, өссө хортуоппуй, оҕуруот аһын уурар боппуолдьалаах. Куораты кытта тэҥнээтэххэ, сыана 2-3 төгүл чэпчэки. Гаастаах, киин ситимтэн кэлэр уулаах сир учаастага – 700 000 солкуобай. Суоллара аспаал бүрүөһүннээх, чааһынай дьиэлэргэ киирэр кыра уулуссалар кыһыл кумах кутуулаахтар, онон ардах түстэҕинэ, Саталга курдук, кыра массыына бадарааҥҥа батыллыбат. Хатаһы кытта тэҥнээтэххэ, манна бөһүөлэк киинигэр үстүү этээстээх аныгылыы тупсаҕай көрүҥнээх, болкуонугар хараҥа витражнай таастаах, күн сылааһынан ууну ититэр таас дьиэлэр элбэхтэр.
ОЛОХ-ДЬАҺАХ ӨҤӨТҮГЭР 25-50% КЫРАНЫ ТӨЛҮҮЛЛЭР
Эниэргийэни харыстыыр «өйдөөх дьиэлэри» туттаран, күн сылааһынан дьиэлэрин, ууларын сылытан, олох-дьаһах өҥөтүгэр 25-50% кыраны төлүүллэр. Оттон сайыҥҥы кэмҥэ ититии төлөбүрүттэн олох да босхолоноллор, кыһын төһөнү туттубуттарыттан көрөн төлөбүрү ааҕаллар. «Өйдөөх дьиэлэр» автономнай гаас хочуоллаахтар, дьиэлэрин иһигэр сылааһы бэйэлэрэ билэллэринэн холбууллар.
2012-2016 сылларга Жатайга 53 хаарбах дьиэни көтүрэн, саҥа кыбартаалы тутан таһаарбыттара. 2019 сыл көрдөрүүтүнэн, Жатайга 10 135 киһи олорор. Куорат нефтебазатын уонна өрүс аалларын тутар, өрөмүөннүүр собуот үлэһиттэригэр анаан оробуочай бөһүөлэги 1948 сыллаахха төрүттээбиттэрэ. Жатай – Дьокуускай куорат уокуругар киирэр.
Марианна Тыртыкова, edersaas.ru