Жатайдааҕы суудуналары оҥорор собуот (судоверфь) былаан быһыытынан 2021 сыл ахсынньытыгар бастакы аалы оҥоруохтаах этэ. Ол кыаллыбат буолла. Тоҕо? Былырыын кыһын олус тымныы буолан уонна коронавирус дьаҥа мэһэйдээн, итинник балаһыанньа үөскээтэ.
СӨ тырааныспарын уонна суол хаһаайыстыбатын миниистирэ Владимир Сивцев Санкт-Петербурга ыытыллыбыт XVI TRANSTEC диэн норуоттар икки ардыларынааҕы тырааныспар боппуруостарын сайыннарыыга аналлаах мунньахха суудуналары оҥорор собуот уу аалын быйыл ахсынньыга оҥоруохтааҕа кэккэ төрүөттэринэн эһиил көһөрүллүбүтүн туһунан эттэ.
«2022 сыл ортотун эргин ылсыбыт былааммытын олоххо киллэрэргэ быһаарынныбыт. Билигин тустаах эбийиэккэ күүстээх үлэ барар. Халлаан тымныйыар диэри туох баар силигэ ситэриллиэҕэ», — диэн Саха сиринээҕи тырааныспар миниистирэ быһааран биэрбит.
edersaas.ru