Жанна Барашкова: “Биһиги баайбыт – ийэ тылбыт”

Ааптар: 
Бөлөххө киир:

СӨ “Сайдыы” саха тылын, литэрэтиирэтин, төрүт култуура учууталларын ассоциациятын бэрэссэдээтэлэ Жанна Барашкова Ил Дархан быһа эпииринэн алын кылаастарга саха тылыгар чааһы элбэтии туһунан этиитигэр бэйэтин санаатын үллэһиннэ.

edersaas.ru

— СӨ Ил Дархана Айсен Сергеевич Николаев быһа эпииринэн, Саха сиригэр алын кылаастарга саха тылын чааһын элбэтэргэ быһаарылынна диэн иһитиннэрдэ. Мантан салгыы Ил Дархан тыл дьылҕатын илиитигэр ылан, аан маҥнай тыл сайдыытын ирдиирэ буоллар өссө түмүктээх буолуох этэ.

Бастатан туран, аныгы XXI үйэҕэ тугу даҕаны быраҕан туран тылбытын өрүһүйэргэ, тылбытын харыстыырга турунуохтаахпыт. Иккиһинэн, кэлиҥҥи биэс сыл өрөспүүбүлүкэҕэ саха тылын учууталларын түмсүүтүн салайдым, араас боппуруостарынан дьарыктанабыт. Онтон көрдөххө, тыл дьылҕатынан дьарыктанар, тыл боппуруостарыгар тохтоон сүбэлэһэр, тыыннаах тылынан, хайдах үөртиэхтээхпит, сайыннарыахтаахпыт туһунан дьарыктанар, тэрийэр, ыытар тэрилтэ да, салайааччы  даҕаны тарбахха баттанар аҕыйах. Уһуйаантан саҕалаан тыл бэлиитикэтигэр тиийэ сүрүннүүр биир тэрилтэ баара ордук этэ.

Өбүгэлэрбититтэн кэлбит сахабыт тылын аҥаардас оскуолаҕа үөрэтиллэр биридимиэт эрэ быһыытынан көрбөккө, бу биһиги дьылҕабыт, олохпут саамай туллар тутааҕа диэн толкуйдуохтаахпыт. Оҕотуттан кырдьаҕаһыгар тиийэ биир санааҕа кэлиэхпитин баҕарабын.

Саха тылын чааһа оскуола салалтатыттан улахан тутулуктаах. Ким ханна олорорунан салайааччылар, баһылыктар, оскуола дириэктэрдэрэ — бука бары тылбыт туһугар биир санаалаах, түмсүүлээх буолуоҕуҥ диэн бэлиэтээн туран ыҥырабын. Оччоҕо эрэ тылбыт сүтэн-оһон хаалбакка, өрүү күөх, хойуу оттоох алаас кэриэтэ чэлгийэн иһиэ этэ.

Өрөспүүбүлүкэ салайааччыта саха тылын дьылҕатын тус бэйэтин илиитигэр ылан, муоһалаан кэнэҕэски Ил Дархан илиитигэр туттаран, ол курдук, Аҕа баһылыктан Аҕа баһылыкка бэриллэн иһэр күндү баай, кылаат буолуон баҕарабыт. Биһиги баайбыт көмүс, алмаас таас буолбатах. Биһиги баайбыт – ийэ тылбыт!”, — диэн санаатын үллэһиннэ.

“Саха сирэ” хаһыат, edersaas.ru

 

+1
0
+1
0
+1
0
+1
0
+1
0
+1
0
+1
0