Саха сиригэр биллэриллибит Доруобуйа сылын чэрчитинэн, «Медицина для каждого” бырайыак үлэлиэҕэ. Бу бырагыраамаҕа доруобуйа харыстабылын каадырдарынан хааччыйыы, ол иһигэр, “Земский доктор” уонна “Земский фельдшер” бырагыраамалар киирэллэр.
Бастатан туран, Арктика улуустара каадырынан хааччыллыахтаахтар. Бу туһунан “Аһаҕас парламент” дискуссионнай былаһаакка кэмигэр доруобуйа харыстабылын миниистирин солбуйааччы Алексей Яковлев иһитиннэрдэ.
“Земский доктор”, “Земский фельдшер” бырагыраамаларынан 932 исписэлиис туһаммыт, балартан 702 миэдик тыа сиригэр баран үлэлииллэр. Ол иһигэр, Арктикаҕа 193 быраас уонна 73 биэлсэр барбыттар.
2020 сылга 133 быраас уонна 23 биэлсэр бу бырагыраамалары туһанан, үлэлии сылдьаллар. 2021 сылга өссө 137 быраас барыаҕа диэн СИА иһитиннэрэр.
Санатар буоллахха, «Земский доктор» бырагырааманан үлэлии барбыт бырааска 2020 сылтан 2 мөлүйүөн солкуобай, биэлсэргэ 1 мөлүйүөн солкуобай бэриллэр. Бу суума былырыын Ил Дархан Айсен Николаев ыйааҕынан үрдээбитэ (икки төгүл кыра этэ). Ыйаах чэрчитинэн, куорат тииптээх уонна оробуочай бөһүөлэктэргэ үлэлии тиийбит быраастар 2 мөлүйүөн солкуобайы, биэлсэрдэр 1 мөлүйүөн солкуобайы ылаллар. Оттон 50 тыһыынча киһиэхэ диэри нэһилиэнньэлээх пууннарга үлэлиир быраастарга — 1 мөлүйүөн солкуобай, биэлсэрдэргэ 500 тыһыынча солкуобай бэриллэр.
Ангелина Васильева, “Саха сирэ” хаһыат, edersaas.ru