“Земскэй учуутал” бүтүн дойду үрдүнэн үлэлиир бырагыраама буолар. Былырыын олоххо киирбитэ. Тустаах бырагырааманан үлэлии барар учууталларга 2 мөлүйүөн солкуобай үп көрүллэр.
Дуогабар быһыытынан, бырагыраамаҕа хапсыбыт 55-гэр диэри саастаах учууталлар, талбыт оскуолаларыгар 5 сыл баран үлэлиэхтээхтэр. Өскөтүн, Арассыыйа атын эрэгийиэннэригэр 1 мөлүйүөн солкуобай харчы көрүллэр эбит буоллаҕына, Уһук Илин уокурукка эрэ 2 мөлүйүөн солкуобай үп бэриллэр.
СӨ Үөрэҕин уонна наукатын министиэристибэтин каадырга салаатын кылаабынай исписэлииһэ Мария Аянитова иһитиннэрбитинэн: “Муус устар 2 күнүнээҕи туругунан, Арассыыйа араас эрэгийиэннэриттэн, ол иһигэр Саха сириттэн, уопсайа, 153 сайаапка биэрбиттэриттэн, докумуонун 26 учуутал ыытта. Биология, химия, физика учууталларын вакансиятыгар докумуоннар киирэ иликтэр. Холобура, Уус Маайа улууһун Петропавловскай оскуолатыгар физика учууталын миэстэтигэр икки сайаапка киирбитэ эрээри, биир да киһи докумуонун ыыта илик. Усуйаана улууһун Хайыр оскуолатын информатикаҕа учууталыгар эмиэ 2 саайаапка киирдэ, биир даҕаны докумуон суох. Сайаапка ыыппыт дьонтон 40-ча бырыһыана эрэ Саха сирин олохтооҕо. Онон олохтоох учууталлары бырагыраамаҕа көхтөөхтүк кытталларыгар ыҥырабыт. Ирдэбил быһыытынан, куонкуруска үлэ уопута учуоттанар эрээри, докумуон киирбэтэх түгэнигэр, эдэр да учуутал хапсар кыахтаах. Аны, холобур, Уус Маайа оскуолатын учууталын вакансиятыгар докумуон киирбэтэх буоллаҕына, тустаах улуустан төрүттээх учуутал үлэлии барар түгэнигэр баала үрдүк буолар. Ол эбэтэр бэйэлэрэ үөрэммит оскуолаларыгар үлэлии барыахтарын сөп”, — диэн быһаарда.
Нэһилиэнньэ атын эрэгийиэн дьонун тоҕо кытыннараҕытый диэн хомуруйар эрээри, олохтоох дьон бэйэлэрэ хото кыттыбат түгэннэригэр, тыа сирин оскуолаларын анал идэлээх учууталларынан хааччыйар инниттэн кыһалҕаттан атын эрэгийиэн дьонуттан сайаапкалары ыларга күһэллэллэр.
Кэлэр 2021-2022 үөрэх дьылыгар 16 квота көрүллүбүтэ. Маннык оскуолаларга вакансиялар бааллар:
- Уус Маайа улууһун Петропавловскай оскуолата (физика учуутала, 19 чаас);
- Томпо улууһун Дьабарыкы Хайа оскуолата (математика уонна физика учуутала, 25 чаас);
- Абый улууһун Майыар оскуолата (биология уонна химия учуутала, 24 чаас);
- Булуҥ улууһун Хара Уулаах оскуолата (биология, химия, география учуутала, 25 чаас);
- Эдьигээн улууһун Эдьигээн оскуолата (физика учуутала, 20 чаас);
- Анаабыр улууһун Сааскылаах оскуолата (математика учуутала, 24 чаас);
- Орто Халыма улууһун Хатыҥнаах оскуолата (англия тылын учуутала, 29 чаас);
- Үөһээ Халыма улууһун Нелемнэй оскуолата (химия уонна биология учуутала, 18 чаас);
- Муома улууһун Соболоох оскуолата (физика уонна информатика учуутала, 21 чаас);
- Өймөкөөн улууһун Уус Ньара оскуолата (информатика уонна математика учуутала, 26 чаас);
- Нерюнгри улууһун Хани бөһүөлэгин 16-с нүөмэрдээх оскуолата (англия тылын учуутала, 18 чаас);
- Эбээн Бытантай улууһун Кустуур оскуолата (химия уонна биология учуутала, 28 чаас);
- Өлөөн улууһун Дьилиндэ оскуолата (физика, математика, астрономия учуутала, 23 чаас);
- Усуйаана улууһун Хайыр оскуолата (информатика уонна физика учуутала, 24 чаас);
- Үөһээ Дьааҥы улууһун Адыаччы оскуолата (англия тылын учуутала, 27 чаас);
- Кэбээйи улууһун Сэбээн Күөл оскуолата (биология уонна химия учуутала (23 чаас).
Тыа сиригэр учууталлыы барыан баҕалаах дьон болҕойуҥ, докумуону муус устар 15 күнүгэр диэри ылаллар. Ыам ыйын 15 күнүгэр диэри куонкурус кыайыылаахтара биллиэхтэрэ.
Куонкуруска кыттыан баҕалаах дьон сайаапкаҕытын zemteacher.apkpro.ru (Банк вакансий-Выбрать регион-Подать заявку) порталга ыытыаххытын сөп. Салгыы сканируйдаммыт докумуоннаргытын yakutiazemteacher@mail.ru электроннай почтаҕа ыытаргыт ирдэнэр.
“Земскэй учуутал” бырагыраама куонкуруһун, төһө сайаапка киирбитин туһунан iroipk-sakha.ru саайтка көрүҥ. Сиһилии 8(4112)42-20-69, 89142850992 Ушницкая Сардаана Егоровна, 89142322403 Данилова Сардана Эркинбековна ыйыталаһыҥ.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).