Саха сиригэр 2020 сылга “Земскэй учуутал” бырагыраама вакансиятын испииһэгэ билиннэ.
“Саха сирэ” хаһыат, edersaas.ru
Ахсынньы 24 күнүгэр СӨ Үөрэҕин уонна наукатын министиэристибэтэ бырагыраамаҕа кыттар өрөспүүбүлүкэ 19 улууһун кытта видеонан мунньаҕы ыытта.
Мунньах кэмигэр миниистир Владимир Егоров 2020 сылга Саха сиригэр саамай ирдэнэр 19 вакансия быһаарыллыбытын иһитиннэрдэ. “Тустаах бырагыраама үлэлиир кэмигэр 2020-2022 сылларга Саха Өрөспүүбүлүкэтигэр, уопсайа, 50 вакансия көрүлүннэ. Бырагыраама сүрүн соруга – оҕо ханна олороруттан тутулуга суох барыларын тэҥ хаачыстыбалаах үөрэҕинэн хааччыйыы. 2020 сыл саҕаланыытыгар куонкуруска кыттар дьон 55-гэр диэри саастаах, 5 сыл устата үлэлииргэ бэлэм уонна 1 эбэтэр үрдүкү категориялаах буолара ирдэнэр. Ону таһынан, үөрэтэр биридимиэтигэр, педагогикаҕа, психологияҕа учуонай истиэпэннээх, 10 сылтан итэҕэһэ суох педагогическай ыстаастаах, биир тэрилтэҕэ уһуннук үлэлээбитэ биһирэнэр”, — диэн бэлиэтээтэ.
Санатан эттэххэ, “Земксэй учуутал” бырагыраама 2020-2022 сылларга үлэлиэҕэ. Бырагыраама нэһилиэктэри, оробуочай бөһүөлэктэри, куораттыы тииптээх бөһүөлэктэри, 50 тыһыынчаҕа диэри нэһилиэнньэлээх куораттар оскуолаларын учууталларынан хааччыйар соруктаах. Ити кэрчик кэмҥэ Саха сиригэр барыллаан 50 квота көрүллүбүтэ.
Бырагырааманан Уһук Илин уокурукка үлэлии барар учууталларга 2 мөл. солк, онтон атын эрэгийиэннэргэ 1 мөл.солк. көрүллэр.
Мунньах кыттыылаахтара бэлиэтииллэринэн, вакансия испииһэгин бэлэмнииргэ нэһилиэнньэлээх пууннар демографическай уонна социальнай-экэнэмиичэскэй кэскиллэрин, ону тэҥэ, учууталга ордук наадыйар улуустар учуоттаммыттар.
“Земскэй учуутал” бырагыраама 2020 сыллааҕы Саха сиригэр вакансиятын СӨ Үөрэҕин уонна наукатын министиэристибэтин саайтыгар көрүөххэ сөп.
СӨ Үөрэҕин уонна наукатын министиэристибэтин пресс-сулууспата.