«Саха» НКИХ «Талбан» биэриигэ СӨ Үөрэх миниистирин бастакы солбуйааччы Ирина Любимова уонна СӨ Бырабыыталыстыба Бэрэссэдээтэлин солбуйааччы Сергей Местников ыйытыыларга хоруйдаатылар.
Ыйытыы: —«Земскэй учуутал» бырагыраамаҕа кыттан үлэлии барыахпын баҕарбытым да, быйыл квота суох диэбиттэрэ.
Ирина Любимова, СӨ Үөрэх миниистирин бастакы солбуйааччы: —«Земскэй учуутал» диэн учууталлары өйүүр федеральнай бырагыраама. Биһиги эрэгийиэммтигэр ааспыт үөрэх түмүгэр, бу 2020 сылга, 19 квота кэлбитэ. Онтон 12 квотаны Арктика улуустарыгар биирдиилээн, бэйэлэрин баҕаларынан түҥэппиппит. 2021 сыллаахха эбии квота кэлэр. Баҕалаах буоллаххына министиэристибэҕэ кэлэн кыттыаххын сөп. Манна даҕатан эттэхпинэ, «Арктика учуутала» диэн учууталларга ананар саҥа бырагыраама баар. Онно Арктика улуустарыгар быйыл саҥа барбыт учууталларга аҕыйах хонугунан көмө оҥоһуллуоҕа.
Ыйытыы: —Хоруона хамсыгын кэмигэр, үөрэхтээһин эйгэтигэр, устудьуоннарга, оскуола үөрэнээччилэригэр уонна уһуйаан иитиллээччилэригэр, төрөппүттэргэ туһаайан санааҕытын үллэстиҥ эрэ. Сүрүн болҕомто туохха ууруллуохтааҕый?
Сергей Местников, СӨ Бырабыыталыстыбатын Бэрэссэдээтэлин солбуйааччы: — Үөрэх эйгэтэ сүрдээх киэҥ, дириҥ. Этиллэрин курдук, биһиги үөрэххэ төһө улахан болҕомтобутун уурабыт да, сайдар кэскилбит онтон тутулуктаах. Онон хас биирдии үөрэнээччи, устудьуон үөрэххэ төһө эппиэтинэстээхтик сыһыаннаһарыттан, ылсан дьарыктанарыттан, билиитин кэҥэтинэриттэн тутулуктаах. Төһөнөн кыһаллар да, соччонон кини инники олоҕор бигэ туруктаах буолар. Онон туохтан да куттаммакка, бэйэлэрин билиилэрин кэҥэтэллэригэр уонна инники олохторугар эрэллээхтик үктэнэн иһэллэригэр баҕарабын. Төрөппүттэргэ туһаайан, оҕолорбут үөрэнэллэригэр, сайдалларыгар сөптөөх усулуобуйаны тэрийэр эбээһинэспит диэн этэбин. Ону хас биирдии төрөппүт өйдүүр уонна тутуһар буолуохтаах диэн эрэнэ саныыбын.
Ыйытыы: —Үөһээ Дьааҥыга Адыаччы нэһилиэгэр, Сайдыыга оскуола тутуутун туһунан ыйытыыга туох хоруйу биэриэххитий? Болҕомто эрэйэбит.
Сергей Местников, СӨ Бырабыыталыстыбатын Бэрэссэдээтэлин солбуйааччы: —Тыа сиригэр оскуола тутуутун туора туппаппыт, болҕомтоҕо ылабыт. Ити этиллибит улуус оскуолатын хонтуруолга ылан ыйыталаһыам. Сөптөөх быһаары ылыллыаҕа.
Хаартыска: hse.ru