“Земскэй учуутал” федеральнай бырагыраама порталыгар педагогическай үлэһиттэртэн куонкуруска кыттарга сайаапкалары ыла тураллар.
Ити туһунан СӨ Үөрэҕин уонна билимин министиэристибэтин пресс-сулууспата edersaas.ru саайтка иһитиннэрэр. Ол курдук, олунньу 8 күнүнээҕи туругунан 124 сайаапка киирбит. Сайаапкалары Тыва, Дагестан, Бурятия, Алтай, Марий Эл өрөспүүбүлүкэлэриттэн, Амур, Липецкэй, Свердловскай, Тамбовскай уобаластартан, Саха Өрөспүүбүлүкэтиттэн, о.д.а. ыыталаабыттар.
“Бырагыраама “Үөрэх” национальнай бырайыак иитинэн үлэлиир. 2020 уонна 2021 сылларга “Земскэй учуутал” бырагырааманан өрөспүүбүлүкэ оскуолаларыгар квоталар ханна көрүллүбүттэрин (география), эрэгийиэн территориятын уратытын, өрөспүүбүлүкэ сэлиэнньэлэрин социальнай-экэнэмиичэскэй сайдыыларын кыаҕын учуоттаан, улуустар ыыппыт 32 этиилэрин кытта билсэн баран, СӨ Үөрэҕин уонна билимин министиэристибэтэ 2022 сылга өрөспүүбүлүкэ бары экэнэмиичэскэй зоналарын хабар 15 вакансияны бигэргэппитэ. Бырагыраама, педагогическай идэни саҥа саҕалыыр эдэр да, элбэх ыстаастаах уопуттаах учууталларга даҕаны улахан кыаҕы биэрэр”, — диэн миниистири бастакы солбуйааччы Михаил Присяжнай этэр. Биэс сыл дуогабарынан үлэлии барыахтаах дьон тус счеттарыгар ыйыллыбыт суума балаҕан ыйын иннинэ түһэр итиэннэ харчыны бу киһи хайдах, ханна баҕарарынан туһанар кыахтаах диэн быһаарар.
Ыспыраапка: Саха Өрөспүүбүлүкэтэ “Земскэй учуутал” федеральнай бырагыраамаҕа 2020 сылтан кыттар. Бырагыраама 50 тыһыынчаҕа диэри нэһилиэнньэлээх тыа сирин оскуолаларыгар, оробуочай бөһүөлэктэргэ, куораттыы тииптээх бөһүөлэктэргэ, эбэтэр куораттарга учуутал тиийбэт боппуруоһун быһаарар соруктаах. Тустаах бырагырааманан Уһук Илин уокуругар ыйыллыбыт вакансияларынан биэс сыл болдьохтоох үлэлии барбыт учууталларга 2 мөл. солк. суумалаах биирдэ бэриллэр төлөбүр көрүллэр. Саха Өрөспүүбүлүкэтигэр үс сылга, уопсайа, 50 кубуота көрүллүбүтүттэн иллэрээ сыл 19, былырыын 16, быйыл 15 кубуота үллэриллибитэ. Сайаапканы 2022 сыл тохсунньу 10 күнүттэн муус устар 15 күнүгэр диэри ылаллар.
Эрэгийиэннэҕи операторынан С.Н.Донской-II аатынан үөрэҕи сайыннарар уонна идэ таһымын үрдэтэр институт анаммыта. Сиһилии 50-69-88, 50-69-96 (СӨ Үөрэҕин уонна билимин министиэристибэтин каадырга салаата) итиэннэ 89142322403 (Үөрэҕи сайыннарар уонна идэ таһымын үрдэтэр институт, оператор Сардаана Данилова) нүөмэрдэринэн билсиэххитин сөп.
Людмила ПОПОВА, “Саха сирэ” хаһыат, edersaas.ru