Былырыын тохсунньуттан “Земскэй учуутал” федеральнай бырагырааманы олоххо киллэрии үлэтэ саҕаламмыта. Уопсайа, 50 квота көрүллүбүтэ. Былырыын итинтэн 19 миэстэ бэриллибит эбит буоллаҕына, быйыл 16 миэстэни тыырбыттар.
“Земскэй учуутал” бырагыраамаҕа сайаапканы хомуйуу муус устар ортотугар диэри барар. Үгүс миэстэлэр хоту, Арктика улуустарыгар көрүллүбүттэр.
СӨ Үөрэҕин уонна наукатын министиэристибэтин каадырга салаатын кылаабынай исписэлииһэ Мария Аянитова: “Земскэй учуутал” бырагырааманан учууталлары үлэҕэ ылыы түһүмэхтэринэн барар. Ол курдук, муус устар 15 күнүгэр диэри сайаапкалары ылабыт. Салгыы муус устар бүтүүтүгэр диэри докумуоннары бэрэбиэркэлиибит, анаалыстаан көрөбүт, баалларын ааҕабыт. Онтон үһүс түһүмэххэ ыам ыйын 1-15 күннэригэр куонкурус хамыыһыйата рейтинг түмүгүнэн боротуокуолга илии баттыыр, кыайыылаахтарга иһитиннэрии ыытабыт. Бүтэһик түһүмэххэ куонкуруһу кыайбыттар бэйэлэрин баҕаларынан үлэлиир оскуолаларын, улуустарын кытта билсэ кэлиэхтэрин сөп. Бу ыам ыйын 16 күнүттэн бэс ыйын 15 күнүгэр диэри салҕанар. Биэс сыл дуогабардаһан бараллар. Ол иһин дьиэлэрин-уоттарын, үлэлиир усулуобуйаларын билсэллэр. Бэйэлэрэ кыайан кэлбэт түгэннэригэр видео, хаартыска нөҥүө билиһиннэриэхпитин сөп. Инники күөҥҥэ Арктика улуустарын туруорабыт. Онно үлэлии барыан баҕалаах аҕыйах”, — диэн эттэ.
Күн бүгүн Тыва, Алтай, Саха Өрөспүүбүлүкэлэриттэн, Иркутскай, Липецкэй, Кемеровскай, Тюменскэй уобаластартан, Забойкальскай, Камчатскай, Красноярскай кыраайдартан, Ханты-Мансийскай автономнай уокуруктан, уо.д.а. эрэгийиэннэртэн, уопсайа, 78 сайаапка киирбит.
“Земскэй учууталынан” бырагыраамаҕа Абый, Анаабыр, Булуҥ, Үөһээ Дьааҥы, Эдьигээн, Кэбээйи, Муома, Нерюнгри, Өймөкөөн, Өлөөн, Орто Халыма, Томпо, Уус Маайа, Усуйаана, Эбээн Бытантантай улуустарын оскуолалара хабыллыбыттар. Манна биология, химия, математика, физика, информатика, астрономия, англия тылын учууталларыгар наадыйаллар.
Санатан эттэххэ, бырагыраамаҕа 55-гэр диэри саастаах учууталлар хапсаллар. 5 сыл устата дуогабардаһан үлэлии бараллар. Бырагыраама кыттыылаахтарыгар Уһук Илин уокурукка 2 мөлүйүөн солкуобай, онтон атын эрэгийиэннэргэ 1 мөлүйүөн солкуобай харчынан төлөбүр көрүллэр.
Былырыын үлэлии барбыт учууталлар үлэлэрин ситиһиилээхтик салҕыыллар. “Саха сирэ” хаһыат, edersaas.ru сыл устата тустаах бырагырааманы тиһигин быспакка сырдатан, учууталлары кытта кэпсэтэн турар.
Людмила ПОПОВА, “Саха сирэ” хаһыат, edersaas.ru