“Земскэй учуутал” бырагыраамаҕа Арассыыйа атын эрэгийиэннэриттэн 126 сайаапка киирбит
“Земскэй учуутал” федеральнай бырагыраама быйыл тохсунньуттан үлэтин саҕалаата. Бырагыраамаҕа хапсыбыт учууталлар тыа сиригэр биэс сыл учууталлыы барыахтаахтар. Дуогабардаспыт учууталларга 2 мөлүйүөн солкуобай көрүллэр.
СӨ Үөрэҕин уонна наукатын министиэристибэтин саайтыгар сурулларынан, күн бүгүн 203 сайаапка киирбит. Итинтэн 77 Саха сирин олохтоохторуттан, 126 Арассыыйа атын эрэгийиэннэриттэн. Cайаапка ыыппыт дьонтон 18 учуутал эрэ докумуонун туттаран, бэлиэтэниини ааспыт.
“Земскэй учуутал” бырагырааманан Саха сиригэр, уопсайа, 50 квота көрүллүбүтэ. Итинтэн 19 миэстэҕэ быйыл учууталлары ылыахтаахтар. Сүрүннээн математика, физика учууталлара уонна баһыйар үгүс ахсаана хоту эргин, Арктика улуустарыгар ирдэнэллэр.
Ханнык оскуолаҕа саамай элбэх сайаапка киирбитин ырытан көрүөҕүҥ. Бүгүҥҥү күн туругунан, 37 сайаапка Муома оройуонун Н.С. Тарабукин аатынан Улахан Чыыстай орто оскуолатыгар киирбит. Итинтэн 11 сайаапканы Саха сириттэн биэрбиттэр, уоннааҕылара — Арассыыйа атын эрэгийиэнин олохтоохторо. Билиҥҥитэ докумуонун 4 өрөспүүбүлүкэ учуутала эрэ туттарбыт. Тустаах оскуолаҕа нуучча тылын уонна литэрэтиирэтин учууталыгар наадыйаллар.
Дьааҥы улууһун Эҥэ орто оскуолатыгар англия тылын учууталынан барыан баҕалааҕын туһунан 22 учуутал биллэрбит, итинтэн алтата — Саха сириттэн. Докумуонун 2 учуутал (Хотугу Осетия-Алания өрөспүүбүлүкэтэ, Ханты-Мансийскай АУо) туттарбыт.
Оттон Анаабыр улууһун Сааскылаах уонна Ньурба улууһун Сүлэ орто оскуолаларыгар англия тылын учууталлара ирдэнэллэр. Бу икки оскуолаҕа 18-тыы сайаапка киирбит. Онтон Сүлэҕэ 4 учуутал Саха сириттэн, 1 учуутал Алтайтан докумуоннарын туттарбыттар.
Булуҥ улууһун Таймылыыр, Усуйаана улууһун Тумат оскуолаларыгар биир даҕаны сайаапканы биэрбэтэхтэр. Манна математика, физика учууталларыгар наадыйаллар. Итинтэн атын оскуолаларга 3-15 сайаапка киирбит.
“Земскэй учуутал” бырагырааматынан вакансиялар СӨ Үөрэҕин уонна министиэристибэтин саайтыгар сиһилии суруллаллар. Сайаапканы муус устар ортотугар диэри ылаллар.
Людмила ПОПОВА, edersaas.ru
Мария ВАСИЛЬЕВА (СИА) хаартыскаҕа түһэриитэ.