Бүгүн, олунньу 21 күнүгэр, Арктика норуоттар икки ардыларынааҕы оскуолатыгар урукку кэмҥэ киэҥник ыытыллыбыт “Зарница” оонньуу буолан ааста. Бу оскуола устуоруйатыгар бастакы оонньуу Арассыыйа дьоруойа Роман Александрович Китанин сырдык кэриэһигэр ананна. Оонньууну Росгвардия Саха сиринээҕи салаатын үлэһиттэрэ, майор Дмитрий Юрьевич Никитенко салайыытынан иилээн-саҕалаан ыыттылар.
Барыта 4 хамаанда бастыыр иһин күрэхтэстэ, инники миэстэни былдьаста. Хамаандаҕа 7-с, 8-с, 10-с кылаас үөрэнээччилэрэ киирдилэр. Буоларын курдук, “Зарница» күрэс сүрүн соруга тоҥуу хаары кэһэ сылдьан утарылаһааччы хамаанда былааҕын былдьаан ылан бэйэтин “сиригэр” аҕалыыта буолар. Хас биирдии оонньууга 8 мүнүүтэ бэрилиннэ. Оҕолор ким төһө кыахтааҕынан хамаандаҕа очко аҕаларга туох баар күүстэрин ууран туран кииристилэр.
Маны тэҥэ, ох саанан ытыыга күрэхтэһии ыытылынна. Хас биирдии таба ытыыга хамаандаҕа очко бэриллэр буолан, бары кыһаллан туран кытыннылар.
Түмүккэ Эрчимэн Моисеев хапытааннаах “Потешный полк» хамаанда кыайыылаах үрдүк аатын сүктэ. Кини кэнниттэн тилэх былдьаһа Константин Ефимов салайааччылаах «Гачеровскай былаах» хамаанда, үһүс бочуоттаах миэстэҕэ Семен Пестряков «Семеновскай былаах» хамаандата таҕыстылар.
Бу күн бэстилиэтинэн ытыыга уонна КСУ нормативын толорууга уолаттар биирдиилээн кииристилэр. Манна Тикситтэн кэлэн бу оскуолаҕа үөрэнэ сылдьар Александр Корякин тэҥнээҕин булбата. Онон кини муҥутуур кыайыылаах аатын ылан уонна Росгвардия бирииһин — анал чаһыны бэлэх тутан үөрүүтэ үрдээтэ.
Арктика норуоттар икки ардыларынааҕы оскуолатын “Кампуһун” пресс-сулууспата.