СӨ булчуттарын уонна балыксыттарын уопсастыбаларын сойууһун бэрэссэдээтэлэ Закира Иванова мин саайтка “Ыт сылыгар сахалар өссө биир “саха ыттана” сыстыбыт” диэн суруйуубун (27.12.2018) ааҕан баран: “Ыттана сыстыбыт диэн сыыһа”, — диэтэ уонна этиитин маннык бигэргэттэ:
—Норуоттар икки ардыларынааҕы кинологическай федерация стандартарга хамыыһыйатыгар Россия кинологическай федерациятын бигэргэтиитэ барбыта. Илиҥҥи Сибиир лаайката “саха ытынан” билиниллэригэр Юрий Борисовтыын (“Байанай” булчут ыттаахтар кулууптара) уонна Станислав Городиловтыын (Ыт иитээччилэр өрөспүүбүлүкэтээҕи ассоциациялара) үс тэрилтэ үһүөн көмөлөөн үлэлээбиппит. Биһигини Ил Түмэн айылҕа ресурсаларыгар, айылҕаны туһаныыга уонна экологияҕа сис кэмитиэтин бэрэссэдээтэлэ Владимир Прокопьев улаханнык өйөөбүтэ. Кэмитиэт суруга ыйааһыннаах буолан, дойду стандартарга хамыыһыйатын ааспыта. Онон, ити “саха ыта” диэн аат эбиллибитигэр Владимир Михайловичтаах сүҥкэн оруоллаахтар. Билигин Норуоттар икки ардыларынааҕы федерация стандартарга хамыыһыйата 305-с №-дээх FCI стандарты EAST-SIBERIAN LAIKA (Vostotchno-Sibirskaia Laika, Sakha Yta) диэн сурукка киллэрэн бигэргэтэрин эрэ күүтэбит. Онон Саха сиригэр “саха лаайката”, “Илиҥҥи Сибиир лаайката-саха ыта” уонна “табаны маныыр лаайка” диэн 3 боруодаланныбыт диэн дорҕоонноохтук этэр кыахтанныбыт.
“Байанай” булчут ыттаахтар кулууптарын салайааччыта Юрий Борисов бэлиэтииринэн, табаны маныыр лаайка Россия атын хотугу регионнарыгар баар буоллаҕына, биһиэхэ сүтэ быһыытыйбыт, маннык боруода ыт хас да табаһыты солбуйуон сөптөөҕүнэн, сөргүтэн, үөскэтэн, тарҕатан, табаны иитии салаатыгар киэҥник туһанар сорук турар. “Төрдүһүнэн аны саха булчут лаайкатын боруода быһыытынан бигэргэттэриэхпит. Аны саас кулун тутар ыйга экспедиция үлэтин саҕалыа. Дойду идэтийбит экспертэрэ кэлиэхтэрэ”, — диир Юрий Петрович.
Василий НИКИФОРОВ.