Захар Колодезников Конституцияҕа уларытыылары киллэриигэ санаатын үллэһиннэ

Арассыыйа Төрүт Сокуонугар уларытыылары киллэрии тула дьүүллэһии барар, онуоха сэҥээрээччи да баар, утарааччы да көстөр. 

edersaas.ru.

Дьокуускай куорат тэрилтэлэрин маҥнайгы сүһүөх идэлээх сойуустарын холбоһугун бэрэссэдээтэлэ Захар Колодезников маннык этэр:

— Төрүт Сокуоҥҥа уларытыылары киллэриигэ мин бастатан туран, Судаарыстыбаннай Дуума дьокутааттара, Бырабыыталыстыба чилиэннэрэ икки гражданстволаах буолууларын бобору биһириибин, «вид на жительство» оҥорторуу кинилэргэ төрүт наадата суох диибин.

Социальнай өттүгэр ыллахха, тиийинэн олоруу алын кээмэйин билигин сокуонунан бигэргэтэн кэбистэххэ, кэлин хамнаһы, босуобуйалары уонна биэнсийэни инфляция таһымынан үрдэтэн иһэргэ кэлин уустуктардаах буолуон сөп. Ити учуоттаныахтаах.

Уларытыылары киллэрии сүнньүнэн бигэргэнэр, хас биирдии пуунунан тус-туһунан куоластаммат быһыылаах. Мин оннук өйдөөн олоробун. Дьиҥинэн, билигин, төһө даҕаны коронавирус дьаҥынан сибээстээн, бэйэни изоляцияланыы эрэсиимигэр олордорбут, биирдии пууннарынан нэһилиэнньэҕэ быһааран биэрэр наада этэ диибин. Онуоха тэлэбиисэри туһаныахха, дьон дьиэтигэр олорор буолан, «күөх экрантан» арахпат. Ити эрээри тэлэбиисэри көрдөххө, сүрүннээн «Төрүт Сокуоҥҥа уларытыылары киллэриэххэ» диэн көннөрү ыҥырар эрэ курдуктар, биирдии пуунунан быһаарыы суох. Өр сылларга үлэлиир Төрүт Сокуоммутун оҥоробут эбээт, онон тиэтэйэр наадата суох этэ. Үгүс киһи туох боппуруостар туруоруллубуттарын да билбэтэ, мунаахсыйара мэлдьэһиллибэт.

Раиса Сибирякова, «Саха сирэ» хаһыат, edersaas.ru